Հայկական լոբբին ի վիճակի չէ թուլացնելու ամերիկյան հարաբերություններն Ադրբեջանի և Թուրքիայի հետ. Մեթյու Բրայզա

Հայկական լոբբին ի վիճակի չէ թուլացնելու ամերիկյան հարաբերություններն Ադրբեջանի և Թուրքիայի հետ։ Այս մասին Hurriyet Daily News-ին տված հարցազրուցում ասել է Ադրբեջանում ԱՄՆ նախկին դեսպան Մեթյու Բրայզան։ Դեսպանը նաև նշել է, որ Ադրբեջանը ԱՄՆ–ի համար ռազմավարական շահերի տեսանկյունից կարևոր գործընկեր է համարվում։ Ըստ նրա՝ իրեն Ադրբեջանում դեսպան վերանշանակելու Օբամայի որոշումը, որը շրջանցեց Սենատի դիրքորոշումը, ցույց է տալիս Ադրբեջանի ռազմավարական կարևոր նշանակությունը ԱՄՆ–ի համար։

Խոսելով 2015–ի հեռանկարների մասին, նա նշել է, որ այդ տարի նշվելու է 1915–ին կատարված Հայոց ցեղասպանության 100–ամյակը, որը կարևոր նշանակություն է ունենալու։ Ըստ Բրայզայի, Թուրքիան ունի բոլոր հնարավորությունները՝ հասարակության տարբեր շերտերի հետ քննարկումներ և ուսումնասիրություններ անցկացնելու պատմական փաստաթղթերի առումով։

«Ես նաև համոզված եմ, որ հայ-թուրքական հարաբերությունների և Լեռնային Ղարաբաղի հակամարտության կարգավորման գործընթացների ամբողջական կապը սխալ է։ Ես կարծում եմ, որ այդ երկու գործընթացները կարող են օգնել միմյանց։ Հայ-թուրքական հարաբերությունների առաջընթացը կարող է նպաստել Լեռնային Ղարաբաղի հակամարտության կարգավորմանը, և հակառակը։ Սակայն, այդ երկու գործընթացների միջև կապի արհեստական ժխտումը, ի վերջո հանգեցնում է Լեռնային Ղարաբաղի հակամարտության կարգավորման գործընթացի տապալմանը, քանի որ Հայաստանը պարզապես մտադրված չէ որևէ փոխզիջման գնալու, եթե դրա համար նախադրյալներ ստեղծվեն։ Այսպիսով, անհրաժեշտ է խթանել երկու գործընթացները զուգահեռ։ Մենք արդեն տեսել ենք, որ երբ Ադրբեջանը Թուրքիայի կողմից տարածաշրջանում իր շահերը հաշվի չառնելու միտում է տեսնում, ադրբեջանցի քաղաքական գործիչները կարողանում են խանգարել հայ–թուրքական հարաբերությունների կարգավորման գործընթացին», - ասել է Բրայզան։ 

Հիշեցնենք, որ Մեթյու Բրայզայի՝ Ադրբեջանում ԱՄՆ–ի դեսպանի ժամկետը ավարտվել է 2011–ի դեկտեմբերին։ Վերջինս նախագահ Օբամայի հրամանով դեսպան էր նշանակվել 2010–ի դեկտեմբերին։ Այս տարի հունվարին Ադրբեջանում ԱՄՆ–ի դեսպանի ժամանակավոր գործերի հավատարմատար է նշանակվել փոխդեսպան Ադամ Սթերլինգը։