Խոջալուի դեպքերի վերաբերյալ լսումներ՝ իսրայելական Կնեսետում. ադրբեջանական ԶԼՄ-ներ

Այս ամսվա ընթացքում իսրայելական Կնեսետում տեղի կունենան Խոջալուի իրադարձությունների վերաբերյալ լսումներ, հաղորդում է 1news.az-ը՝ վկայակոչելով Ադրբեջանի ու Իսրայելի միջխորհրդարանական աշխատանքային խմբի ղեկավար, Միլի Մեջլիսի պատգամավոր Եվդա Աբրամովը։

Վերջինս ասել է, որ իսրայելական խորհրդարանից իրեն հայտնել են, որ լսումները տեղի կունենան «Խոջալուի ցեղասպանության 20-ամյակի նախօրեին»՝ հավելելով, որ լսումներին հրավրված են նաև Ադրբեջանի ներկայացուցիչները։

Պատգամավորն ընդգծել է նաև, որ այդ հարցը քննարկվում է ավելի քան երկու ամիս։ «Կապված այս հարցի հետ՝ ես հունվարին եղել եմ Իսրայելում, հանդիպել խմբի անդամների և սփյուռքի ներկայացուցիչների հետ։ Արդյունքում ստացել եմ իսրայելական կողմի համաձայնությունը։ Սա այդ ուղղությամբ առաջին քայլն է, բայց այնտեղ նաև հայամետ պատգամավորներ կան, որոնք կընդդիմանան մեզ և Կնեսետի մեր ընկերներին»,-ասել է Աբրամովը։

Նա նաև ընդգծել է, որ Կնեսետի խորհրդարանի խոսնակ Ռեուվեն Ռիվլինի անունից արդեն լսումներին մասնակցելու հրավերներ են ուղարկվել Ադրբեջանի նախագահի վարչակազմ, Սփյուռքի հետ աշխատանքների պետկոմիտե և Մեջլիս։ 

Լուրեր.com-ի հետ զրույցում ՀՀ ԱԳՆ մամլո խոսնակ Տիգրան Բալայանը կասկածի տակ առավ ադրբեջանական լրատվամիջոցների տարածած այս տեղեկատվությունն` ընդգծելով, որ ինչպես ցույց է տալիս փորձը, ադրբեջանական լրատվամիջոցների կողմից տարածվող նման լուրերն իրականությանը չեն համապատասխանում: