Սոս Ջանիբեկյանի մայրը դժգոհում է բժիշկներից

Ինչպես ավելի վաղ տեղեկացրել էինք, շատերի կողմից սիրված դերասան Սոս Ջանիբեկյանը Մոսկվայում սննդից թունավորվել էր: Չնայած արդեն դերասանի ինքնազգացողությունը լավ է, անգամ ինքն է այդ մասին տեղեկացրել, բայց հարկ ենք համարում հրապարակել նաև դերասանի մոր` Աննա Աղասարյանի բողոքը, թե ինչ վերաբերմունք է ցուցաբերվել հիվանդի նկատմամբ բժիշկների կողմից.

«Երեկ, վերադառնալով Մոսկվայից (ռուսական ֆիլմի նկարահանում էր), տղաս` Սոսը, վատացավ, և շտապ օգնության մեքենան տարավ մեզ հիվանդանոց:

Բժիշկ- Ի՞նչ է սրսկել Շտապ օգնության բժիշկը:

Ես- Այդտեղ գրված չի՞:

Բժիշկ- Չէ, բա հիմա ինչպե՞ս իմանանք` ինչ են սրսկել, որ նույն բանը նորից չսրսկենք:

Ես- Նա պարտավոր էր գրել, չէ՞:

Բժիշկ- Մոռացել է:

Սոսը շարունակ փսխում էր, անձեռոցիկ եմ խնդրում, (իմ վերցրածը վերջացել էր):

Բուժքույր- Չկա, սա հիվանդանոց է, կաֆե չի, որ անձեռոցիկ տանք:

Ես- Խնդրում եմ, գոնե բինտ կամ բամբակ տվեք:

Քիչ անց դաժանության բուժքույրը բերում է զուգարանի թուղթ երևի մոտակա զուգարանից, ու ես սարսափով նայում եմ, թե ինչպես է անօգնական որդիս դրանով մաքրում բերանը:

Բժիշկ- ԲԱԿ անալիզ պետք է արվի:

Ես- Արեք:

Բժիշկ- Մենք չունենք:

Ես- Ո՞վ ունի, որտե՞ղ կա:

Բժիշկ- Նորքի հիվանդանոցում:

Նորից շտապ օգնություն են կանչում: Սոսը դողացնում է, վերմակ են գցում վրան, որի վրա չորացած փսխանքի հետքեր են:

Ես- Վերմակը կեղտոտ է:

Բուժքույր- Շտապ օգնությունը լվացքատուն չունի:

ԵՍ- Բայց կարող է` դուք սրանով տիֆով հիվանդի եք տեղափոխել, իսկ հիմա գցել եք իմ երեխու վրա՞:

Բուժքույր- Դե մենք ինչ իմանայինք, որ հիվանդը Սոս Ջանիբեկյանն է:

Ես- Ես թերթում կգրեմ այս մասին:

Բժիշկ- (խառնվելով խոսակցությանը) Դրանից բան չի փոխվելու, մենակ մեզ գործից կհանեն»:

..............................................................SOS!!!!!!!!!!!!!!!!!!!!!!!!!!!!!