Կխորացվի Հայաստանի եւ Լեռնային Ղարաբաղի Հանրապետությունների փոխգործակցությունը՝ տեղական մարմինների մակարդակով

Հոկտեմբերի 28-ին Լեռնային Ղարաբաղի Հանրապետության կառավարությունում կայացած խորհրդակցությանը քննարկվել են Հայաստանի մարզերի եւ Արցախի վարչական շրջանների փոխգործակցության խորացմանն առնչվող հարցեր:

Ըստ Հայաստանի տարածքային կառավարման նախարարության աշխատակազմի հասարակայնության հետ կապերի բաժնի հաղորդագրության, խորհրդակցությունը անց է կացվել Հայաստանի փոխվարչապետ, տարածքային կառավարման նախարար Արմեն Գեւորգյանի գլխավորած պատվիրակության' Լեռնային Ղարաբաղի Հանրապետություն կատարած աշխատանքային այցի շրջանակում:

Խորհրդակցությանը ՀՀ փոխվարչապետ Ա.Գեւորգյանն ու ԼՂՀ վարչապետ Ա. Հարությունյանը բարձր են գնահատել վերջին տարիներին ձեւավորված համագործակցությունը' միաժամանակ ընդգծելով այն առավել սերտացնելու անհրաժեշտությունը: Կարեւորվել է նաեւ Երեւանի ու Ստեփանակերտի միջեւ կապերի խորացումը, ինչպես նաեւ այլ համայնքների միջեւ ուղիղ շփումների հաստատումը: Պայմանավորվածություն է ձեռք բերվել տեղական ինքնակառավարման ոլորտի բարեփոխումների գործընթացին վերաբերող քննարկումներին նաեւ արցախցի մասնագետներին ներգրավելու մասին:

Երկուստեք կարեւորվել են նաեւ գյուղատնտեսության ոլորտում փորձի, տեղեկատվության փոխանակման հարցերը: Անդրադարձ է եղել զբոսաշրջային հնարավորութունների ընդլայնման խնդիրներին: Նշվել է, որ Ստեփանակերտի օդանավակայանի գործարկումը նոր հեռանկարներ է բացելու ոլորտի զարգացման համար: Պայմանավորվածություն է ձեռք բերվել Հայաստանի զբոսաշրջային ոլորտի կազմակերպությունների հետ նոր երթուղիների, զբոսաշրջային նոր փաթեթների մշակմանը վերաբերող հարցեր քննարկելու շուրջ:

Խորհրդակցությունից հետո Ա. Գեւորգյանի գլխավորած պատվիրակությունն այցելել է Ստեփանակերտից ոչ հեռու գտնվող ջեռուցման կաթսաների, վառարանների արտադրության մեջ մասնագիտացած «Բիոտեխնոլոգիա» ընկերություն, ծանոթացել արտադրությանը: Գործարանի արտադրանքը նախատեսված է համեմատաբար մեծ տարածքների (180-1500քմ) ջեռուցման համար, եւ հիմնական պատվիրատուները հիմնարկ-ձեռնարկությունները, դպրոցներն ու զորամասերն են: Նոր տեխնոլոգիաներով արտադրվող ջեռուցման համակարգերը նաեւ տնտեսապես շահավետ են, քանի որ շահագործման համար օգտագործվում է պինդ վառելիք: Պայմանավորվածություն է ձեռք բերվել գործարանի արտադրանքը նաեւ Հայաստանում օգտագործելու վերաբերյալ:

ՀՀ փոխվարչապետի գլխավորած պատվիրակության կազմում են Հայաստանի Արարատի, Լոռու, Կոտայքի, Շիրակի, Սյունիքի, Տավուշի մարզպետները: Պատվիրակությունը հոկտեմբերի 28-ին կվերադառնա Երեւան: