Իրանը ԱՄՆ–ի դեմ պատրաստ է օգտագործել «ծովային կամիկաձեներ»

Իրանի դեմ ռազմական գործողություններ սկսելու դեպքում Թեհրանը ԱՄՆ–ի և նրա դաշնակիցների դեմ կարող է օգտագործել «կամիկաձեների» կողմից կառվարվող արագընթաց մոտորոնավակներ և սուզանավեր, հաղորդում է Reuters–ը՝ վկայակոչելով ԱՄՆ–ի ռազմածովային ուժերի  5-րդ նավատորմի հրամանատար Մարկ Ֆոկսի խոսքերը։ Ընդ որում, Իսլամական Հանրապետության բանակը պատրաստվում է նոր ժամկետով (մինչեւ  մարտի 21) զորավարժություններ անցկացնել, հաղորդում է Итар-Тасс–ը։

Ըստ Ֆոկսի, Իրանը ավելացնում է արագընթաց նավերի և սուզանավերի քանակը և այժմ զինվում է 10 նոր փոքր սուզանավերով։ Նա վստահեցրել է, որ Իրանը չի կարողանա փակել Օրմուզի նեղուցը, որով իրանական նավթը փոխադրվում է արաբական և եվրոպական երկրներ։

ԱՄՆ–ի ռազմածովային ուժերն Իրանի դեմ ռազմական գործողություններ սկսելու բազմաթիվ հնարավոր տարբերակներ են մշակել, որոնք պետք է քննարկվեն և հավանության արժանանան նախագահ Բարաք Օբամայի կողմից։ Ֆոկսը նշել է, որ ԱՄՆ–ի ռազմածովային ուժերը լիովին պատրաստ են ռազմական հարված հասցնել Թեհրանին։

«Ընտրվել են հարձակման չափազանց ճշգրիտ տարբերակներ, որոնք անկասկած արդյունավետ են լինելու ԱՄՆ–ի համար», – հավաստիացրել է զինվորականը՝ չմանրամասնելով իր խոսքերը։