Շնորհվել է բազային կազմակերպության կարգավիճակ

Ս. թ. փետրվարի 2-3-ը ԱՊՀ գործադիր կոմիտեում (ք. Մինսկ) տեղի ունեցավ ԱՊՀ մասնակից պետությունների մշակույթի և արվեստի հաստատություններին բազային կազմակերպության կարգավիճակ շնորհելու հարցերով զբաղվող աշխատանքային խմբի նիստը, որին մասնակցում էին Հայաստանի, Բելառուսի, Ղազախստանի, Ռուսաստանի Դաշնության, Տաջիկստանի, Ուկրաինայի (դիտորդի կարգավիճակով) ներկայացուցիչները։

Հայաստանից «մշակութային ժառանգություն» ուղղությամբ բազային կազմակերպության կարգավիճակ ստանալու հայտով ներկայացել է «Մատենադարան» Մեսրոպ Մաշտոցի անվան հին ձեռագրերի գիտահետազոտական ինստիտուտը (պատվիրակ՝ Արա Խզմալյան, Արխիվային փաստաթղթերի պահպանման, գիտական մշակման և թվայնացման բաժնի վարիչ)։ Ներկայացվել է Մատենադարանի գործունեությունը, մասնավորաբար մշակութային ժառանգության պահպանման ու վերականգման բնագավառում միջազգային համագործակցությունը, 2012 թ. նախատեսվող ծրագրերը։ Ցուցադրվել է «Հիշողության կերպարանքները» միջազգային սեմինարը և Մատենադարանի նոր մասնաշենքը ներկայացնող տեսաֆիլմը։

Աշխատանքային խմբի որոշմամբ ընդունվել է Հայաստանի Հանրապետության առաջարկը և «մշակութային ժառանգություն» ուղղությամբ Մեսրոպ Մաշտոցի անվ. հին ձեռագրերի գիտահետազոտական ինստիտուտին շնորհվել է բազային կազմակերպության կարգավիճակ:

Բազային կազմակերպության գործունեությունը ենթադրում է գիտամեթոդական ցուցումների մշակում, ձեռնարկների համատեղ հրատարակում, տարաբնույթ կրթական ծրագրերի իրականացում, գիտաժողովների, կլոր սեղանների կազմակերպում։