«Ժողովուրդ». Այս անգամ ընտրատարածքներն էին լցոնվում... մարդկանցով

Ինչպես ասում են, յուրաքանչյուր նոր լավ մոռացված հինն է: Խորհրդարանական ընտրություններին «որակական հեղափոխության» պատրաստվող ՀՀԿ-ն կիրակի օրը Հրազդանում կայացած քաղաքապետի ընտրություններում ցույց տվեց, որ ամենևին էլ «չի աճել»: Նրանք կիրառում են հին մեթոդներից մեկը' ընտրական առևտուրը' 5000 դրամով գնելով ՀՀ քաղաքացու քվեն: Ընդ որում, դա անում են սպառնալիքի ազդեցական տակ, ստորացնելով մարդուն: Եթե նախկինում ընտրությունների օրը քվեատուփերն էին լցոնվում, ապա այս անգամ ընտրատարածքներն էին լցոնվում...մարդկանցով:

«Հայաստանի իշխող կուսակցությունը, ընտրության օրը ՀՀ ոստիկանության մոտակա բաժին դիմելու փոխարեն, «Ժողովուրդ»-ի դեմ երկու անգամ հայտարարություն տարածեց, թե մենք միջամտում ենք ընտրական գործընթացներին: Իհարկե, երբ «Ժոդովուրդ»-ը տեսավ, որ Կոտայքի մարզպետի մանկլավիկներն ընտրատարածքում փորձում են խոչընդոտներ հարուցել, դիմեց ոստիկաններին: Ի պատիվ նրանց, Կովալենկո Շագհալդյանի մանկլավիկները մի քանի տեղամասերից վռնդվեցին' անվերադարձ: Իսկապես, մենք մանրազնին ուսումնասիրեցինք, եթե կուզեք, միջամտեցինք կիրակի օրը կայացած քաղաքապետի ընտրություններին, քանի որ դրանք մայիսին կայանալիք խորհրդարանական ընտրությունների մանրապատկերն էին: Եվ կարող ենք այսօրվանից արձանագրել, որ այս գարնանը Հայաստանում ընտրություններ տեղի չեն ունենա: Պարզապես ժողովրդից գողացված միլիոնների մի մասը մայիսին կբաժանեն' յուրաքանչյուրին տարեկան հազար դրամ «հասանելիքով»' այդպիսով ապահովելով ռեժիմի վերարտադրությունը»,- գրում է թերթը: