ԱՄՆ նախագահ Բարաք Օբաման առաջարկում է կրճատել Հայաստանին հատկացվող տնտեսական օգնությունը

Նախագահ Օբաման կոչ է արել կրճատել Հայաստանի տնտեսական օգնությունը 19 տոկոսով։ Այդ մասին Վաշինգտոնից տեղեկացնում է Հայ դատի ազգային կոմիտեն: ԱՄՆ նախագահն առաջարկել է 2013-ին Հայաստանի տնտեսական աջակցության հիմնադրամին հատկացնել 27,219,000 դոլար: 2012-ին Հայաստանի հատկացումը կազմել է 40 միլիոն դոլար: Տնտեսական աջակցության հիմնադրամի թվերի մեջ ներառված չէ Թմրանյութերի միջազգային վերահսկողության և իրավապահ մարմինների աջակցության 2,824,000 դոլարը և Համաշխարհային առողջապահական ծրագրերի (ԱՄՆ ՄԶԾ) 2,500,000 դոլարը, որոնք նախկինում ներառված են եղել հիմնադրամի միջոցներում: Այսպիսով, ընդամենը կհատկացվի 32,543,000 դոլար, ինչը 2012-ին հատկացման հետ համեմատ կնվազի 19 տոկոսով:

Ռազմական օգնության վերաբերյալ Օբամայի վարչակազմը առաջարկել է Հայաստանի և Ադրբեջանի միջև հավասարություն հաստատել արտաքին ռազմական ֆինանսավորման և միջազգային ռազմական կրթության և ուսուցման ծրագրերում, առաջարկելով համապատասխանաբար 2.7 միլիոն դոլար արտաքին ռազմական ֆինանսավորման և 600,000 դոլար ռազմական կրթության համար յուրաքանչյուր երկրի համար:

Լեռնային Ղարաբաղի համար առանձին հատկացում չկա, թեև վերջին մի քանի տարիներին ԱՄՆ ՄԶԾ-ն հատկացրել է 2 միլիոն դոլար այս նպատակով:

Բացի հատկացման կրճատումից Օբամայի վարչակազմը Հայաստանին չի առաջարկել հայտ ներկայացնել Հազարամյակի մարտահրավերների կորպորացիայի աղքատության կրճատման ծրագրերի համար, ինչպես նաև քայլեր չի կատարել երկկողմ տնտեսական հարաբերությունների զարգացման, ասնավորապես առևտրի և ներդրումների շրջանակային համաձայնագրի, կրկնակի հարկման դաշնագրի կամ ազատ առևտրի համաձայնագրի ուղղությամբ:

Հարավկովկասյան տարածաշրջանի երկրների առաջարկվող հատկացումները

Տնտեսական աջակցության հիմնադրամ

Հայաստան $27,219,000

Ադրբեջան $11,029,000

Վրաստան $42,660,000

Արտաքին ռազմական ֆինանսավորում

Հայաստան $2,700,000

Ադրբեջան $2,700,000

Վրաստան $14,400,000

Միջազգային ռազմական կրթություն և ուսուցում

Հայաստան $600,000

Ադրբեջան $600,000

Վրաստան $1,800,000

Թմրանյութերի միջազգային վերահսկողություն և իրավապահ մարմիններ

Հայաստան $2,824,000

Ադրբեջան $1,226,000

Վրաստան $4,000,000

Համաշխարհային առողջապահական ծրագրեր – ԱՄՆ ՄԶԳ

Հայաստան $2,500,000

Ադրբեջան ---

Վրաստան $4,000,000