«Երբ վճարում ես երկու գրպանից»

Կարեն Վարդանյանը ֆեյսբուքյան իր էջում գրել է.

«Վերջին օրերին աշխուժացել են քննարկումները կուտակային կենսաթոշակների վերաբերյալ: Հնչեցվում են տարբեր դիրքորոշումներ, սակայն հավանաբար դեռ նկատի չի առնվել մի կարևոր հանգամանք:

Յուրաքանչյուր ամիս աշխատողը կենսաթոշակային կառավարիչ հիմնադրամ է փոխանցելու իր եկամտի 5 տոկոսը: Նույնքան էլ ավելացնելու է պետությունը, սակայն ոչ ավելի, քան 25000 դրամ: Եվ այստեղ է ի հայտ գալիս մի կարևոր հարց՝ իսկ ինչ միջոցներից պետությունը կատարելու այդ ծախսերը: Ակնհայտ է՝ ՀՀ պետական բյուջեի միջոցներից:

Քանի որ 2014թ. բյուջեն դեռ չի հաստատվել, ապա որպես ելակետային տվյալ ընդունենք 2013թ. ՀՀ Պետբյուջեով սահմանված համամասնությունները: Եվ այսպես՝ 2013թ. պետական բյուջեի եկամուտները պետք է կազմեն 1 տրլն 32 մլրդ 830 մլն 760 հազար 800 դրամ, որի առյուծի բաժինը՝ 993 մլրդ 81 մլն դրամը, հարկերի և տուրքերի գծով ստացված եկամուտներն են: Այլ կերպ ասած՝ մեր պետությունը գումար չի վաստակում, տնտեսական գործունեությամբ չի զբաղվում, այլ ընդամենը հարկում է:

Ուստի՝ ինչ է ստացվում: Ստացվում է, որ այն 5 տոկոսը, որը պիտի վճարի պետությունը մեզնից յուրաքանչյուրի համար, արդեն իսկ ստացել է մեզնից՝ եկամտային հարկի, մեր կողմից ապրանք-ծառայությունների ձեռքբերումից ստացված ԱԱՀ-ի կամ այլ հարկերի տեսքով: Այլ կերպ ասած՝ վերցրեց մեր մի գրպանից, տարավ հիմնադրամ, ապա այդ հիմնադրամը վերցրեց նաև մեր մասնաբաժինը՝ մեր մյուս գրպանից:

Ուրեմն՝ կամ պիտի նվազեցվի եկամտային հարկը, կամ՝ հանվի քաղաքացու կողմից վճարում կատարելու պահանջը»: