Տարոն Մարգարյանը մայրաքաղաքում տիրող իրավիճակի պատասխանատվությունը գցել է Գյանջումյանի վրա

Երեկ Երևանի քաղաքապետարանը մամլո հաղորդագրություն էր տարածել, որ իր դիմումի համաձայն զբաղեցրած պաշտոնից ազատվել է Կենտրոն վարչական շրջանի ղեկավար Գագիկ Գյանջումյանը։

Լուրեր.com–ի լրագրողն այս տեղեկատվության մասին փորձեց պարզաբանում ստանալ Երևանի քաղաքապետարանի տեղեկատվության և հասարակայնության հետ կապերի վարչությունից, որտեղից պատասխանեցին, որ «ի՞նչ պարզաբանում տան, եթե Գյանջումյանն իր սեփական դիմումի համաձայն է ազատվել աշխատանքից»։ 

Մեր տեղեկություններով, սակայն, Երևանի քաղաքապետ Տարոն Մարգարյանը Գագիկ Գյանջումյանին ստիպել է աշխատանքից ազատվելու դիմում գրել՝ վերջին օրերին տեղած առատ ձյան պատճառով ձնամաքրման աշխատանքները արդյունավետ չկազմակերպելու համար։

Տարոն Մարգարյանն այս քայլով փորձում է առատ տեղումների հետևանքով քաղաքում տիրող իրավիճակի պատասխանատվությունը գցել Գյանջումյանի վրա։