Սիրիայի իշխանությունների գործողությունները ՄԱԿ-ը մարդկության դեմ հանցագործություն է որակել

Սիրիայի իշխանությունների հակակառավարական բողոքի ցույցերի ճնշումը կարելի է համարել մարդկության դեմ հանցագործություն։ Նման հայտարարություն, ինչպես հաղորդում է «Ռիա նովոստին», արել է ՄԱԿ–ի Մարդու իրավունքների գերագույն հանձնակատար Նավի Պիլայը։ 

Նրա խոսքերով, «Սիրիայի իշխանությունների կողմից բռնությունների և ճնշումների բնույթն ու մասշտաբները» այն են փաստում, որ 2011–ի մարտից սկսած հակակառավարական բողոքի ցույցերի ժամանակ իշխանությունների գործողությունները կարելի է որակել իբրև  մարդկության դեմ գործած հանցանք։ Պիլայն ավելացրել է, որ բանակի և անվտանգության ուժերի կողմից քաղաքացիների նկատմամբ բռնությունները, տների, հիվանդանոցների, դպրոցների և այլ քաղաքացիական ենթակառուցվածքների զանգվածային ոչնչացումը փաստում է, որ Սիրիայի իշխանություններն այդ գործողություններում ներգրավում են զինված ուժերին։

ՄԱԿ–ի պաշտոնյան խոսելով, ընդդիմության գործողությունների մասին հայտնել է, որ թեև բողոքի ցույցերը հիմնականում խաղաղ նպատակներով են անցկացվում, սակայն կառավարական ուժերի դեմ զինված գրոհայինների հարձակումների վերաբերյալ հաղորդագրությունների քանակը գնալով ավելանում է։ Ընդ որում Արաբական երկրների լիգայի Սիրիա ուղարկված դիտորդական առաքելության տվյալներով Սիրիայում գործում են ընդդիմադիր զինված խմբավորումներ, որոնք հարձակումներ են իրականացնում և՛ քաղաքացիական բնակչության, և՛ պաշտոնյաների նկատմամբ, գնացնքներ, ավտոբուսներ, ինչպես նաև գազատարներ են պայթեցնում։

Ավելի վաղ Պիլայը հայտարարել էր, որ Սիրիայում 2011–ի մարտից սկսված հակակառավարական ցույցերի ժամանակ սպանվել է ավելի քան 5.4 հազար մարդ։

Ըստ ՄԱԿ-ի տվյալների, ավելի քան 25 հազար մարդ դարձել է փախստական, հազարավոր մարդիկ անհայտ կորած են համարվում, մի քանի հազար մարդ բանտերում են հայտնվել։ 

Հունվարի վերջին Արաբական երկրների լիգայի դիտորդական առաքելությունը բողոքի ցույցերի և բռնությունների ավելացման պատճառով դադարեցրեց աշխատանքները։ Փետրվարի սկսզբին Հոմս քաղաքում նորից վերսկսվեցին արյունահեղությունները, որտեղ, իրավապաշտպանի հաղորդմամբ, օրական տասյակ մարդիկ են զոհվում։