«Հայկական ժամանակ». Հայկ Գևորգյանը չափազանց օրինախախտ վարորդ է

«ՀԺ»-ի թղթակից Հայկ Գևորգյանը , որին ոստիկանությունը մեղադրում է այս տարվա հունվարի 13-ին վրաերթ կատարելու, ծանր վիրավորին հայհոյելու, հանցագործության վայրից փախուստի դիմելու, ապա երկու շաբաթ քննությունից թաքնվելու համար, պարզվում է՝ չափազանց օրինախախտ վարորդ է: Երեկ նա ստացել է ծանուցում այն մասին, որ 2.5 տարի առաջ՝ 2009 թվականի օգոստոսի 29-ին Էջմիածնում խախտել է կանոնները՝ շարք փոխելիս թարթիչը չի միացրել, ինչի համար տուգանվել է 3000 դրամով ու չի վճարել տուգանքը, և հիմա տուգանքի չափը հնգապատկվել է: Հայկ Գևորգյանի կենսագրության մութ էջերը, փաստորեն, ՀՀ ոստիկանությունը ուսումնասիրում է ոչ թե խոշորացույցով, այլ մանրադիտակով, և դա վերջապես տվել է իր արդյունքը. 3000 դրամանոց խախտում՝ երկուսուկես տարի առաջ: Հայրենի իրավապահների աշխատանքը թեթևացնելու համար թերթը հայտնում է, որ 2006-ի հոկտեմբերի 4-ին նա իրենց շենքի բակում մեքենան կայանել է չնախատեսված տեղում, իսկ 2004-ի մարտի 9-ին Լենինգրադյան փողոցում անիվի ծայրով տրորել է հոծ գիծը: