Լավրովը Սիրիայում «լիբիական սցենարի» կրկնվելու մտավախություն է հայտնել

Միջազգային հանրությունը ամեն ինչ անում է, որ Սիրիայի ընդդիմության և իշխանության միջև բանակցություններ չլինեն, հաղորդում է«Ռիա նովոստին»՝ մեջբերելով Ռուսաստանի արտաքին գերատեսչության ղեկավար Սերգեյ Լավրովի հայտարարությունը։ 

«Միջազգային հանրությունն իր մասով պետք է ընդդիմությանը բացատրի բանակցությունների սեղանի շուրջ նստելու անհրաժեշտությունը։ Ես չեմ կարող տրվել էմոցիաներին, և ասել, որ գործընթացը գնում է վարկաբեկիչ նյութերի հավաքմամբ, որն էլ հետագայում կարդարացնի լիբիական սցենարի կրկնությունը», – ասել է նախարարը։

Այս իրավիճակում, առաջին խնդիրն, ըստ Լավրովի, մեխանիզմներ գտնելու անհրաժեշտության հարցն է, որի միջոցով կարելի է կանխել բռնությունները։

«Ամենակարևորը՝ հասկանալ, թե ով է  կառավարական զորքերի դեմ պայքարում ղեկավարում ապստամբներին։ Երկրորդ խնդիրը՝ պետք է հասկանալ, որ եթե բոլոր կողմերը համաձայն են երկխոսության, ուրեմն դա պետք լինի համընդգրկուն սիրիական երկխոսություն»,-ասել է նա՝ նշելով, որ «իրենք տեղեկություններ ունեն, որ ռազմական գործողություններին մասնակցում են ինքնագործունեությամբ զբաղվող զինված խմբեր»։

Լավրովի խոսքերով կարևոր է հասկանալ, «թե ինչո՞ւ են որոշ գործընկերներ հայտարարում, որ այդ երկխոսությանը, իշխանությունները չեն մասնակցի»։ 

Միևնույն ժամանակ նա նշել է, որ Սիրիայի «դաշնակիցների խումբ» ստեղծելու գաղափարը, որով ցանկանում են ընդդիմությանը ներգրավել այդ գործընթացներին, իսկ իշխող ռեժիմին չհրավիրել, ակնհայտորեն նշանակում է, որ այդ հարցում միջազգային հանրությունը միակողմանի դիրքորոշում է որդեգրում Սիրիայի ներքին հակամարտությունում։

«Ինչ վերաբերում է Սիրիայի իշխանություններին, ապա ակնհայտ է, թե ում հետ ենք բանակցում, իսկ հակառակ կողմում մենք պետք է հասկանանք, թե արդյո՞ք Սիրիայի ընդդիմությունը ազդեցություն ունի զինված խմբավորումների վրա», – ասել է Լավրովը։

Խոսելով Սիրիա  խաղաղապահներ ուղարկելու հնարավորության մասին՝ նախարարը վերահաստատել է, որ դա հնարավոր է միայն Սիրիայի իշխանությունների համաձայնության պարագայում։