Ի՞նչ կապ ունի Կարեն Կարապետյանի «Գազպրոմ» գնալը Իրան–Հայաստան գազամուղի հետ

Ռուս փորձագետները կարծում են, որ Երեւանի քաղաքապետ Կարեն Կարապետյանը, ով հրաժարականի դիմում է ներկայացրել այլ աշխատանքի անցնելու կապակցությամբ, «Գազպրոմ»-ում կղեկավարի հետխորհրդային երկրների հետ ընկերության գործունեությունը: Ինչպես հաղորդում է ռուսական «Գազետա»-ն, Կարեն Կարապետյանը զբաղեցնելու է «Գազպրոմ»-ի նախագահ Ալեքսեյ Միլլերի տեղակալի պաշտոնը:

«Իրականում, թե ինչով Կարապետյանը կզբաղվի «Գազպրոմ»-ում, դեռեւս հայտնի չէ: Ընկերությունում մեկնաբանություններ տալուց հրաժարվում են: «Գազպրոմ»-ի գործունեության բոլոր ուղղություններով այժմ զբաղվում են Միլլերի տեղակալները»,- հիշեցնում է Էներգետիկ ազգային անվտանգության հիմնադրամի ղեկավար Կոնստանտին Սիմոնովը եւ ավելացնում, որ դժվար թե Կարապետյանը փոխարինի Միլլերի ներկայիս տեղակալներից որեւէ մեկին: «Հստակ է՝ խոսքը կադրային հաստիքների ընդլայնման մասին է: Չի բացառվում, որ Կարապետյանը ղեկավարի «Գազպրոմ»-ի հարաբերությունները նախկին Խորհրդային Միության անդամ պետությոնների հետ, քանի որ «Գազպրոմ»-ի հետաքրքրւթյունը նախկին խորհրդային տարածքի նկատմամբ աճում է»,- կարծում է փորձագետը:

«Ռուսաստանը Հայաստանին մատակարարում է տարեկան մոտ մեկ միլիարդ խորանարդ մետր գազ: Ռուսաստանի նավթագազային արդյունաբերության միության առաջատար փորձագետ Ռուստամ Տանկաեւը նշել է, որ Հայաստանի հետ շատ դժվար է սակարկելը, քանի որ Երեւանը չի ցանկանում վճարել եվրոպական գներով: Բայց չենք կարծում, որ Կարապետյանի՝ «Գազպրոմ» գալը կապված է գնի շուրջ բանակցությունների հետ: Հայաստանի շուկան շատ փոքր է «Գազպրոմ»-ի համար»,- գրել է կայքը:

Ռուսաստանի գիտությունների ակադեմիայի ավագ գիտաշխատող Վլադիմիր Սաժինն իր հերթին չի բացառել, որ Կարապետյանին հրավիրել են՝ Իրան-Հայաստան գազամուղի նկատմամբ «Գազպրոմ»-ի հետաքրքրության հետ կապված: «Հնարավոր է՝ ռուսական ընկերությունը ցանկանում է մասնաբաժին ստանալ այդ գազամուղում, ինչը հնարավորություն կտա թեկուզ մասամբ վերահսկել Իրանից մատակարարումները»,- կարծիք է հայտնել նա:

«Ամեն դեպքում, «Գազպրոմ»-ի խորհրդի նախագահի տեղակալի աշխատավարձն ավելի բարձր է, քան Երեւանի քաղաքապետինը: Երեւանի քաղաքապետը ստանում է ամսական 300 հազար դրամ, «Գազպրոմ»-ի խորհրդի անդամները՝ մոտ 5 մլն ռուբլի՝ 153,8 հազար դոլար»,- գրում է «Գազետա»-ն: