Այսօր լրանում է ամերիկացի դերասան Ջոն Բերիմորի ծննդյան130-ամյակը

«Մարդը ծեր չէ, քանի դեռ զղջումները չեն փոխարինել երազանքներին» արտահայտության հեղինակը Ջոն Բերիմորն է։

Ամերիկացի հայտնի դերասան, ամերիկյան կինոյի և թատրոնի աստղ, շեքսպիրյան կերպարների դերակատար Ջոն Բերիմորը (իսկական անունը՝ Ջոն Սիդնի Բլայթ) ծնվել է 1882-ին։

Բերիմորի թատերական առաջխաղացումը սկսվել է 1903-ին Բրոդվեում՝ «Ուրախ եմ դրա համար» ներկայացման մեջ նրա դերակատարմամբ: Նա արդեն նկարահանվում էր նաև ֆիլմերում։ Առաջին ֆիլմը, որտեղ նա հանդես է եկել, «Ամերիկյան քաղաքացին» է։ Ջոն Բերիմորին հաջողություն են բերել հատկապես «Բժիշկ Ջեքիլ և միսթր Հայդ», «Շերլոկ Հոլմս» համր ֆիլմերը։ 1930-ականներից հետո, երբ կինոյին ուղեկցում էր նաև ձայնը, Բերիմորը նկարահանվել է «Մոբի Դիկ», «Ռասպուտինը և կայսրուհին», «Մարդը Բլենկլիից» և այլ ֆիլմերում։

Դերասանը խաղացել է նաև թատրոնում՝ «Կիրակի», «Արդարադատություն» ներկայացումներում։ Շեքսպիրյան ներկայացումներում կերտել է Ռիչարդ 3-րդի, Համլետի կերպարները։

1936-ին Բերիմորը հարբեցողության համար հայտնվեց հիվանդանոցում՝ փորձելով ձերբազատվել այդ կախվածությունից։ Հիվանդանոցից դուրս գրվելուց հետո նա նկարահանվեց միայն երկրորդական դերերում։