Բացվեց համակարգչային լսարան

Փետրվարի 15-ին Հայաստանի երիտասարդական հիմնադրամը և Խաչատուր Աբովյանի անվան հայկական պետական մանկավարժական համալսարանի ուսանողական խորհուրդը մանկավարժական համալսարանի հենակետային ավագ դպրոց-վարժարանում բացեցին համակարգչային լսարան։ Հենակետային վարժարանում ֆիզիկամաթեմատիկական, բնագիտական, հումանիտար և տնտեսագիտական հոսքերից բացի, գործում են նաև մշակութային (ռեժիսուրա, օպերատորություն, գեղարվեստական լուսանկարչություն, նկարչություն-դիզայն) և հոգեբանամանկավարժական (հոգեբանություն, լրագրություն) հոսքեր: Վարժարանի 10-12-րդ դասարաններում սովորում է մոտ 330 աշակերտ:

Հայաստանի երիտասարդական հիմնադրամի աջակցությամբ համակարգչային տեխնիկայով կահավորված լսարանի բացումը հնարավորություն կտա ոչ միայն բարձրացնել կրթության որակը վարժարանում, այլև ավելի արդյունավետ կդարձնի տարբեր առարկաների դասավանդումը։
Հայաստանի երիտասարդական հիմնադրամի հոգաբարձուների խորհրդի համակարգող Կարեն Ավագյանը նշեց, որ կրթական հաստատությունների տեխնիկական վերազինման ծրագիրը շարունակական է։ «Այսօր դժվար է պատկերացնել որակյալ կրթություն առանց նյութատեխնիկական հագեցվածության։ Հայաստանի երիտասարդական հիմնադրամն իր կրթական ծրագրերի համատեքստում կարևորում է դպրոցներում նյութատեխնիկական հագեցվածության ուղղությամբ տարվող աշխատանքները։ Հիմնադրամի միջոցներով ոչ միայն կբացվեն համակարգչային լսարաններ, այլև կվերազինվեն լաբորատորիաները, աջակցություն կցուցաբերվի գրադարաններին։ Նման ծրագրեր իրականացվելու են նաև ՀՀ զինված ուժերում։ Մենք պայմանավորվածություն ունենք ՀՀ պաշտպանության նախարարության հետ, և համակարգչային տեխնիկայով հագեցած լսարաններ կբացվեն նաև զորամասերում»,- նշեց Կարեն Ավագյանը։