«Հայկական ժամանակ».15 տարի են ուզել

Թերթի հաղորդմամբ՝ «Մանկապղծության մեջ մեղադրվող «Ախթալայի լեռնահարստացուցիչ կոմբինատի» սեփականատեր Սերոբ Տեր–Պողոսյանի գործով մեղադրող դատախազները դատարանին միջնորդել են նրա նկատմամբ որպես պատիժ սահմանել 15 տարվա ազատազրկում։

Լոռու մարզի ընդհանուր իրավասության դատարանում երեկ ավարտվել է Սերոբ Տեր–Պողոսյանի գործով դռնփակ դատաքննությունը, և դատախազները հանդես են եկել մեղադրական ճառով։ 69-ամյա գործարարը մեղադրվում է Ախթալայի ութ անչափահաս երեխաների հետ սեռական հարաբերություն ունենալու մեջ։ Նրան մեղադրանք է առաջադրված ՀՀ քրեական օրենսգրքի 139 հոդվածի («Սեքսուալ բնույթի բռնի գործողությունները») 2-րդ մասի 3-րդ կետով և 3-րդ մասով։ Մեղադրող դատախազ Հովսեփ Սարգսյանը մեր թղթակցի հետ զրույցում ասել է, որ Սերոբ Տեր–Պողոսյանը մեղադրական ճառը լսել է լուռ։ Նա պատժի չափը լսելուց հետո ևս չի արձագանքել դրան։ Նոյեմբերի 7-ին Տեր-Պողոսյանը և նրա փաստաբանները պետք է հանդես գան պաշտպանական ճառերով։