ՄԱԿ–ի Գլխավոր ասամբլեան Սիրիայի հարցով բանաձև ընդունելու նոր փորձ է անում

ՄԱԿ-ի Գլխավոր ասամբլեան Սիրիայում ստեղծված իրավիճակի շուրջ նոր բանաձև ընդունելու փորձ է անում։ ՄԱԿ–ի Անվտանգության խորհրդում նախկինում Սիրիայի հարցով ներկայացված բանաձևերի վրա Ռուսաստանը և Չինաստանը վետո էին կիրառել։ Պաշտոնական Մոսկվան ու Պեկինը չեն ընդունում ներկայացված բանաձևերում Բաշար Ասադի հրաժարականի պահանջը։ Նոր ներկայացված բանաձևում Ռուսաստանն առաջարկել է մի շարք փոփոխություններ։ 

Ռուսաստանի ԱԳՆ-ն գտնում է, որ բռնությունները  պետք է դադարեցնեն թե՛ իշխանությունները, թե՛ ընդդիմությունը, իսկ հակամարտությունը պետք է կարգավորվի դիվանագիտական ճանապարհով։ Նոր բանաձևը ներկայացրել են Սաուդյան Արաբիան, Կատարը, որը գործնականում չի տարբերվում նախկինում ներկայացված «Մարրոկանյան» բանաձևից, որի նկատմամբ Ռուսաստանը և Չինաստանը վետո էին կիրառել ՄԱԿ–ի ԱԽ–ում։ Նոր փաստաթղթում նշվում է ՄԱԿ–ի ներկայացուցչին Սիրիա գործուղելու անհրաժեշտության մասին, որի նպատակն է լինելու հակամարտության խաղաղ կարգավորումը։ Դա նախորդ փաստաթղթերից տարբերվող միակ դրույթն է, որն ընդգրկվել է նոր բանաձևի տեքստում։ Մնացյալը նորից նույն պահանջներն են, ըստ որի Բաշար Ասադը պետք է հրաժարական տա և իշխանությունը հանձնի փոխնախագահին, հաղորդում է Вести.ru–ն։

Հիշեցնենք, որ արդեն մոտ մեկ տարի է՝ Սիրիայում շարունակվում են հակակառավարական բողոքի ցույցերը։ Ընդդիմությունը պահանջում է նախագահ Բաշար Ասադի հրաժարականը։ Ըստ ՄԱԿ–ի տվյալների, 2011–ի մարտից սկսված ցուցարարների և կառավարական անվտանգության ուժերի միջև բախումների պատճառով զոհվել է ավելի քան 5 հազար մարդ։ Սակայն ոչ պաշտոնական տվյալներով զոհերի թիվը հասնում է 7 հազարի։