Բաշար Ասադի ձեռքերն արյունոտ են, ինչի համար նա պետք է պատասխան տա. ԱՄՆ պետդեպ

ԱՄՆ-ը գտնում է, որ Սիրիայի նախագահ Բաշար Ասադը և իր կողմնակիցները պետք է պատասխան տան երկրում տիրող իրավիճակի համար։

«Մեր կարծիքով, այն սիրիացիներ, այդ թվում Ասադը, որոնց ձեռքերն արյունոտ են, պետք է պատասխանատվության ենթարկվեն իրենց գործողությունների համար», - պետքարտուղարության մամուլի խոսնակ Վիկտորիա Նուլանդի խոսքերը մեջբերում է Интерфакс–ը։

Ի պատասխան հարցին, արդյո՞ք Ասադը կկանգնի միջազգային քրեական դատարանի առաջ, և արդյո՞ք նրան Սլոբոդան Միլոշևիչի ճակատագիրն է սպասում նախագահի պաշտոնից հրաժարվելուց հետո, Նուլանդը պատասխանել է. «Թե ինչ պատասխանատվության պետք է ենթարկվեն Ասադը և նրա ռեժիմի կողմնակիցները, դա սիրիացի ժողովրդը պետք է որոշի»։

Հիշեցնենք, որ նախօրեին Սպիտակ տան խոսնակ Ջեյ Կարնեյը «ծիծաղելի» էր համարել Բաշար Ասադի կողմից երկրում նոր Սահմանադրական հանրաքվե անցկացնելու գաղափարը։

«Դա սիրիական հեղափոխությունը ծաղրի է ենթարկում։ Երկրում բարեփոխումներ անցկացնելու Սիրիայի իշխանությունների խոստումներին հաջորդում են բռնություններն ու խոշտանգումները», – ասել է նա։ 

Փետրվարի 26–ին նշանակված Սահմանադրության հանրաքվեի տեքստից հանվել է երկրում արտահերթ նախագահական ընտրություններ անցկացնելու դրույթը։

«Սիրիայի նախագահական ուղղակի ընտրությունները, որի ժամանակ նախագահն ընտրվում է յոթ տարի ժամկետով, անցկացվում է գործող նախագահի ժամկետի ավարտից հետո», – ասված է փաստաթղթում։ Բաշար Ասադի նախագահության երկրորդ ժամկետը լրանում է 2014–ին։    

Հիշեցնենք, որ Սիրիայում հակակառավարական ցույցերը սկսվել են 2011–ի մարտից, որի ժամանակ, ըստ ՄԱԿ–ի տվյալների, ավելի քան 5.4 հազար մարդ է սպանվել։