Անհայտ փաստեր Ուիթնի Հյուսթոնի I will always love you երգի մասին (տեսահոլովակ)

Ուիթնի Հյուսթոնի I will always love you երգը, որը վերջին 25 տարվա ընթացքում ամենավաճառվողն է, հետաքրքիր պատմություն ունի, որին անդրադարձել է Stop The Presses-ը։

Հանրահայտ երգը գրել է կանտրի ոճում հայտնի երգչուհի Դոլլի Փարթոնը, ընդ որում՝ Հյուսթոնի կողմից այդ երգի կատարումից 20 տարի առաջ։ Հատկանշական է, որ ռոմանտիկ այդ երգն ի սկզբանե սիրո թեմայի հետ առնչություն չի ունեցել։

1973-ին Դոլլի Փարթոնի գրած երգը նվիրված է եղել իր պրոդյուսերին և ընկերոջը՝ Պորտեր Վագոներին։ Փարթոնն այն ժամանակ որոշել էր այլևս առանձին հանդես գալ, ինչի պատճառով Վագոները տխրել էր։ Այդ իսկ պատճառով Փարթոնը գրում է այս երգը, որում ասվում է, թե իրենց ընկերությունն այս ամենով չի վերջանա։ Հետաքրքիր է նաև այն, որ Հյուսթոնն առաջինը չի եղել, որ Փարթոնից հետո երգել է այս երգը։ Լինդա Ռոնսթադն այս երգը ձայնագրել է դեռևս 1975-ին, թեև այն ոչ մի կերպ չազդեց նրա հետագա կարիերայի վրա։

Պարզվում է, որ «Թիկնապահ» ֆիլմում Հյուսթոնի հետ նկարահանված Քևին Քոսթներն է առաջարկել երգչուհուն՝ կատարել Դոլլի Փարթոնի երգը։ Ի սկզբանե ֆիլմում պետք է հնչեր մեկ այլ՝ Ջիմմի Ռաֆինի What Becomes of the Broken-Hearted երգը, սակայն իմանալով, որ այն արդեն հնչել է «Կանաչ տապակած լոլիկներ» ֆիլմում, Քոսթները որոշում է փոխել ֆիլմի երաժշտությունը։

Բացի այդ, Քոսթներն է Հյուսթոնին առաջարկել  I will always love you երգը ֆիլմում երգել առանց երաժշտական ուղեկցության, և այն այդպես էլ հնչում է ֆիլմի առաջին րոպեներին։ Հատկանշական է, որ ֆիլմի պրոդյուսերը դեմ է եղել, որ այն կատարի Հյուսթոնը, և միայն Քոսթների համառության շնորհիվ է Հյուսթոնին հնարավորություն ընձեռվում կատարել այն։

Երգի հետ կապված մեկ այլ ուշագրավ պատմություն էլ կա. մի օր Դոլլի Փարթոնին է զանգահարել Էլվիս Փրեսթլիի պրոդյուսերը և հայտնել, որ Էլվիսը ցանկանում է կատարել իր երգը, բայց կարճ տարբերակով։ Փարթոնն ու Էլվիսի ներկայացուցիչը պայմանավորվում են հանդիպման մասին, ու վերջին պահին Էլվիսի պրոդյուսերը հայտնում է, որ պայմանագիրը կկնքվի միայն այն դեպքում, եթե հեղինակային հոնորարների կեսը ստանա Էլվիսը։ Փարթոնը չի համաձայնում, և գործարքը տապալվում է։

I will always love you երգը հասցրել է նաև կապվել քաղաքական գործընթացների հետ։ 2002-ին Իրաքի բռնապետ Սադամ Հուսեյնը երեք պետական ալիքներով թողարկում է իր նախընտրական հոլովակը, որում հնչում էր այդ երգը՝ սիրիացի երգչուհու կատարմամբ։