«Դորիանս»-ը՝ Եվրատեսիլի ամենահավանական թեկնածուն (տեսահոլովակ)

Դեռ հայտնի չէ, թե ով է ներկայացնելու Հայաստանը մայիսի 22-26-ին Ադրբեջանում կայանալիք «Եվրատեսիլ-2012» միջազգային երաժշտական մրցույթում, բայց արդեն հայտնի է, որ մասնակցի ընտրության հարցը ներքին ընտրությամբ կայացնելու է Հանրային հեռուստաընկերությունը: Մասնակցի ընտրությունը կկատարի հատուկ հանձնախումբը, որտեղ կընդգրկվեն երաժիշտներ, հեռուստատեսության մասնագետներ և երաժշտական պրոդյուսերներ:

«Եվրատեսիլ 2012» գնացող թեկնածուների մեջ նշվում է երկու անուն՝ Լյուսիա Մուն և «Դորիանս»:Արմատներով արցախցի լոսանջելեսաբնակ Լյուսիա Մունը որոշել է «Եվրատեսիլին» մասնակցել միայն այս տարի, որովհետև վստահ է, որ թե՛ հոգեպես և թե՛ տեխնիկապես պատրաստ է ելույթ ունենալ Բաքվում: Ու եթե Լյուսիայի դեպքում իր եվրատեսիլյան Delicious Feeling երգը դեռ պատրաստման փուլում է, ապա «Դորիանս» խումբը արդեն նկարահանել է եվրատեսիլյան երգի տեսահոլովակը:

Դորիանսը, որ երկու տարի շարունակ ճանաչվել է Հայաստանի լավագույն երաժշտական խումբ, ստեղծվել է երեք տարի առաջ: Այն իր առաջին «Ֆլայ» ձայնասկավառակի ձայնագրությունը արել է Բրյուսելում և Փարիզում:

Չնայած Հայստանի հանրային հեռուստաընկերությունը «Եվրատեսիլ 2012»-ին մեր մասնակցի անունը և երգը կհրապարակի մարտի 18-ին, այնուամենայնիվ Հայաստանը ներկայացնող ամենահավանական թեկնածուն «Դորիանս» ռոք խումբն է: Նրանց համար գրված This is our world երգը արդեն պատրաստ է: Երգի տեսահոլովակը նկարահանվել է մեկ շաբաթվա ընթացքում: Երգի հեղինակն է Արման Փահլևանյանը, խոսքերի հեղինակը՝ Վարդան Զադոյանը:

Հիշեցնենք նաև, որ ավելի վաղ «Դորիանս» խմբի պրոդյուսեր Վահագն Գևորգյանը ասել էր, որ խմբի անվտանգության բարձր մակարդակի ապահովման դեպքում իրենք չեն հրաժարվի «Եվրատեսիլ 2012»-ին մասնակցելուց: