Հիլարի Քլինթոնը Համաշխարհային բանկի նախագահի ամենահավանական թեկնածու

ԱՄՆ պետքարտուղար Հիլարի Քլինթոնը դարձել է Համաշխարհային բանկի նախագահի ամենահավանական թեկնածուն, այս մասին հաղորդում է «Bloomberg»-ը՝ վկայակոչելով ԱՄՆ նախագահի վարչակազմի իր անանուն աղբյուրները։ Այդ պաշտոնի մեկ այլ հավակնորդ է համարվում Սպիտակ տան տնտեսական հարցերով նախկին խորհրդական Լոուրենս Սամերսը։

Փետրվարի 15–ին Համաշխարհային բանկի գործող նախագահ Ռոբերտ Զելիկը հայտարարել է, որ պաշտոնավարման ժամկետի ավարտից հետո թողնելու է իր պաշտոնը, որը տեղի է ունենալու այս տարվա հունիսի 30–ին։ Սակայն նախօրեին ԱՄՆ պետդեպարտամենտի ներկայացուցիչ Վիկտորիա Նուլանդը հայտարարել է, որ Քլինթոնը չի պատրաստվում դառնալ Համաշխարհային բանկի նախագահ։

Համաշխարհային բանկի նախագահ Զելիկի տարեկան աշխատավարձը գերազանցում է 450 հազար դոլարը։ Բացի այդ, ըստ կազմակերպության հաղորդագրության, նրա թոշակը կազմելու է մոտ 285 հազար դոլար։

Համաձայն ոչ պաշտոնական տվյալների, Համաշխարհային բանկը միշտ նախագահել է ամերիկացի պաշտոնյա, իսկ Արժույթի միջազգային հիմնադրամի ղեկավար նշանակվում է եվրոպական երկրներից։ Ավելի վաղ ԱՄՆ–ը հայտարարել էր, որ առաջիկա շաբաթներին կհայտարարի այդ պաշտոնի հավակնորդ իր թեկնածուին, հաղորդում է «Lenta.ru»–ն։

2011–ի կեսերին «Reuters»–ը հաղորդել էր, որ Հիլարի Քլինթոնը պետքարտուղարի պաշտոնը լքելուց հետո ստանձնելու է Համաշխարհային բանկի նախագահությունը։ Սակայն, Քլինթոնի ներկայացուցիչ Ֆիլիպ Ռեյնսը հերքել էր այդ տեղեկությունները։