Բրիտանացի ծաղկավաճառը ստեղծել է վարդերից պատրաստված զգեստ՝ սիրահարների համար

Վարդերից պատրաստված զգեստը պատրաստվել էր Asda առևտրի ցանցի մասնագետների կողմից՝ 1725 ծաղիկներից։ Չնայած որ բոլորս էլ նման զգեստներ սովորաբար տեսել ենք բարձր նորաձևության շաբաթների ժամանակ, սակայն վերոհիշյալ ընկերությունը որոշել էր բացառություն անել սիրահարների համար՝ Վալենտինի օրվա կապակցությամբ։

Մասնագետների կարծիքով՝ այս զգեստը կատարյալ ընտրություն կլիներ բոլոր այն աղջիկների համար, որոնք իրենց ընկերոջից ամուսնության առաջարկ են ակնկալում սիրահարների տոնին։

Արտասովոր զգեստի հեղինակը բրիտանացի ծաղկավաճառ Ջո Մասսին է (Joe Massie)։ «Զգեստի պատրաստման աշխատանքներն, իհարկե, շատ ծանր էին, սակայն դա հիանալի փորձ էր»,– պատմել է Մասսին և ավելացրել՝ «Ես փորձել եմ զգեստը վերածել հիասքանչ ծաղկեփնջի, սակայն միևնույն ժամանակ այն պետք է լիներ սեքսուալությունը չթաքցնող, դասական և նուրբ»։

Նշենք նաև, որ զգեստի պատրաստման համար օգտագործվել էր «Նաոմի» (Naomi) տեսակի 1000 վարդի, «Փարփլ փաուեր» (Purple Power) տեսակի 150 վարդի, «Կարմեն» (Carmen) տեսակի 15 վարդի թերթիկներ, 200 քրիզանթեմ, 75 հերբերա, 300 մեխակ։