Անջելինա Ջոլիի նոր աշխատանքը նյարդային խանգարման պատճառ է դարձել

Առաջին անգամ աշխարհահռչակ դերասանուհի Անջելինա Ջոլին հանդես է եկել ռեժիսորի կարգավիճակում։ Նրա դեբյուտային աշխատանքը «Արյան և մեղրի երկրում» ֆիլմն է, որում ներկայացված են 1990-ական թթ. Բալկանյան պատերազմի շրջանում տեղի ունեցած իրադարձությունները։ Ֆիլմի նկարահանումները Ջոլիին ոչ միայն ուրախություն և մեծ բավականություն են պատճառել, այլ նաև նյարդային խանգարում։

Այս մասին նա հայտնել է լրագրողներին՝ մամուլի ասուլիսի ժամանակ. «Ֆիլմի շնորհանդեսից մեկ շաբաթ առաջ ինձ մոտ նյարդային խանգարում է եղել։ Ես զգացի պատասխանատվության ողջ ծանրությունը՝ պատերազմի զոհերի և ֆիլմում մասնակցած բոլոր մարդկանց հանդեպ։ Ես ինձ հարցրի՝ արդյո՞ք ես ազնիվ եմ բոլորի հանդեպ։ Դա կյանքի այն պահերից է, երբ կանգնած ցնցուղի տակ և լալիս ես, և ոչ ոք չի կարող քեզ օգնել»։

Նշենք, որ ֆիլմը պատմում է ռազմագերիների ճամբար ընկած բոսնիացի աղջկա և սերբ տղայի սիրո մասին։ Չնայած այն բանին, որ սիրահարները հայտնվել են բարիկադների տարբեր կողմերում, նրանց միջև ուժեղ զգացմունքներ են ծնվում։