Ընդհանուր ֆինանսավորումը կազմում է 1.1 մլն եվրո

ՀՀ Տնտեսական մրցակցության պաշտպանության պետական Հանձնաժողովը ԵՄ «Մրցակցային և պետական օժանդակության օրենսդրության կիրարկման հզորացումը Հայաստանում» Թվինինգ ծրագրի հետ համատեղ փետրվարի 15-ին անցկացրեց հերթական քննարկումը՝ Հանձնաժողովի և ՀՀ պետական այլ շահագրգիռ մարմինների ներկայացուցիչների մասնակցությամբ:

ԵՄ փորձագետներ պարոն Ֆաբիան Պապեն և պարոն Հանս-Հելմուտ Շնայդերը քննարկման մասնակիցներին ներկայացրեցին օդային տրանսպորտի և ֆինանսական ծառայությունների մասին ԵՄ և Գերմանիայի օրենսդրությունը: Մասնավորապես Հ. Հ. Շնայդերն իր զեկույցում մանրամասնորեն անդրադարձավ եվրոպական քաղաքականությանը՝ ֆինանսական ծառայությունների ոլորտում: Փորձագետը ներկայացրեց ԵՄ հանձնաժողովի ոլորտային ուսումնասիրությունը՝ ֆիզիկական անձանց սպասարկման ոլորտում՝ անդրադառնալով ինչպես ընթացիկ հաշիվների և հարակից ծառայությունների, այնպես էլ վճարային քարտերի և վճարային համակարգի շուկայի մրցակցությանը:

Պարոն Ֆաբիան Պապեն իր զեկույցում ներկայացրեց ԵՄ և Գերմանիայի օրենսդրությունը՝ օդային տրանսպորտի ոլորտում, մասնավորապես անդրադառնալով այս դաշտում մրցակցությունը սահմանափակող գործելակերպերին, գերիշխող դիրքի չարաշահման և համակենտրոնացումների դեպքերին: Փորձագետը ներկայացրեց նաև Գերմանիայում ավիացիայի ոլորտում մրցակցությունը սահմանափակող մի քանի նախադեպեր:

ԵՄ փորձագետները մասնակիցների հետ միասին քննարկեցին Հանձնաժողովի կողմից ուսումնասիրված մի քանի գործեր՝ օդային տրանսպորտի և ֆինանսական ծառայությունների ոլորտների վերաբերյալ:

Նման քննարկումները հնարավորություն են տալիս տեղեկանալ միջազգային փորձին, լավագույն գործելակերպերին և հետագայում կիրառել դրանք՝ այս կամ այն խնդրի արդյունավետ լուծմանը հասնելու հարցում:

Տեղեկացնենք, որ «Աջակցություն կարգավորվող ոլորտներին առնչվող գործերի մասով. օդային տրանսպորտ և ֆինանսական ծառայություններ» թեմայով քննարկումը կազմակերպվել էր մրցակցությանն ու պետական օժանդակությանն առնչվող Թվինինգ ծրագրի շրջանակներում: Ծրագիրն իրականացում են ՀՀ տնտեսական մրցակցության պաշտպանության պետական հանձնաժողովը՝ ԵՄ անդամ երկու պետությունների՝ Գերմանիայի էկոնոմիկայի եւ տեխնոլոգիայի դաշնային նախարարության եւ Լիտվայի Հանրապետության մրցակցության խորհրդի հետ համատեղ՝ 2011-2013 թվականներին: Ծրագրի համընդհանուր նպատակն է նպաստել Հայաստանում մրցակցային միջավայրի բարելավմանը՝ ընդլայնելով ՏՄՊՊՀ-ի լիազորությունները եւ զարգացնելով մրցակցային եւ պետական օժանդակության օրենսդրության կիրարկման կարողությունները: Ծրագիրը ֆինանսավորվում է Եվրոպական միության կողմից: Ընդհանուր ֆինանսավորումը կազմում է 1.1 մլն եվրո: