«Չորրորդ ինքնիշխանություն». Ընդդիմության համատեղ բողոքի ակցիա՝ Ազգային ժողովի մոտ

«Ժառանգություն» եւ ՀՅԴ խորհրդարանական խմբակցությունները փետրվարի 28-ին Ազգային ժողովում 100 տոկոսանոց համամասնական ընտրակարգի անցնելու հարցը դնելու են քվեարկության: Եթե անգամ գլխադասային հանձնաժողովը ցանկություն չի հայտնում հարցը մտցնել ԱԺ օրակարգ եւ այդ առիթով տալիս է բացասական եզրակացություն, ապա խորհրդարանական ընդդիմությունը կարող է հարցը անհետաձգելի ճանաչել, եւ տվյալ քառօրյայի երկրորդ օրվա երկրորդ նիստը քննարկում անցկացնել տվյալ հարցի առիթով, ընդգծում ենք' անկախ հաշվի առնելու իշխող ՀՀԿ-ական կուսակցության ցանկությունը:

Փետրվարի 28-ին խորհրդարանական ընդդիմությունն այդպես էլ կանի: 100 տոկոսանոց համամասնական ընտրակարգի անցնելու հարցը մեկ օր էլ ԱԺ նիստերի շրջանակներում կքննարկվի, ապա հարցը կդրվի քվեարկության: Ամենայն հավանականությամբ այս օրը քաղաքական ուժերը կկազմակերպեն բողոքի ակցիա ԱԺ շենքի մոտ: Նպատակը այդ հարցի առիթով հասարակական ճնշումը մեծացնելն է, եւ ընդգծելը, որ Սերժ Սարգսյանի գլխավորած Հանրապետական կուսակցությունն այս անգամ էլ է դեմ գնում հասարակական պահանջին:

«ՉԻ» տեղեկություններով' հայտարարվելու է քաղաքական ուժերի համատեղ բողոքի ակցիա' հասարակության լայն շերտերի ներգրավմամբ: Ֆորմատը բաց է լինելու, եւ բոլոր քաղաքական ուժերի, հասարակակն կազմակերպությունների ներկայացուցիչներն ու անհատ քաղաքացիները կարող են մասնակցություն ցուցաբերել բողոքի ակցիային: