ՄԱԿ-ի Գլխավոր ասամբլեան Ասադի ռեժիմը դատապարտող նոր բանաձև է ընդունել

ՄԱԿ-ի Գլխավոր ասամբլեան ուրբաթ օրը Նյու Յորքում քվեարկությամբ Սիրիայի իշխանություններին դատապարտող և արյունահեղությանը վերջ տալու բանաձև է ընդունել։

Քվերակությանը մասնակցած ՄԱԿ–ի անդամ բոլոր երկրներից 137–ը կողմ են քվեարկել բանաձևին, 12 երկրներ, այդ թվում՝ Ռուսաստանը և Չինաստանը՝ դեմ, 17–ը՝ ձեռնպահ։

Ռուսաստանը վճռականորեն դեմ է քվեարկել բանաձևի ընդունմանը՝ պահանջելով դատապարտել ոչ միայն Սիրիայի իշխանություններին, այլև ապստամբներին։

Բանաձևը, որը պատրաստվել է Եգիպտոսում, հավանության է արժանացել Արաբական երկրների լիգայի կողմից, որի նպատակն է վերջ դնել Սիրիայում ստեղծված իրավիճակին և ՄԱԿ–ից հատուկ բանագնաց գործուղել այդ երկիր։ Ընդունված փաստաթուղթը չի նախատեսում ՄԱԿ–ի և Արաբական երկրների լիգայի կողմից համատեղ զորք մտցնել Սիրիա։

Ի տարբերություն ՄԱԿ-ի Անվտանգության խորհրդի, որտեղ Ռուսաստանը և Չինաստանը վետո կիրառելու իրավունք ունեն, Գլխավոր ասամբլեայում որոշումներն ընդունվում են ընդհանուր քվեարկության միջոցով, որոնք խորհրդատվական բնույթ ունեն, հաղորդում է Газета.Ru–ն։

Հիշեցնենք, որ փետրվարի սկզբին Ռուսաստանը և Չինաստանը Սիրիային դատապարտող ՄԱԿ-ի Անվտանգության խորհրդի բանաձևը արգելափակել էին։

Սիրիայում անկարգությունները սկսվել են 11 ամիս առաջ։ Ըստ ՄԱԿ-ի տվյալների՝ զոհերի թիվը հասնում է 5.5 հազարի։ Պաշտոնական Դամասկոսը պնդում է, որ ապստամբները աջակցություն են ստանում արտաքին ուժերից։