Պարույր Հայրիկյանը հանրահավաք է հրավիրում. «Այս արհեստական ցրտերը թող մեր սրտերը չսառեցնեն»

Պարույր Հայրիկյանը ֆեյսբուքյան իր էջում գրել է.

«ՄԵՐ ԱՅՍ ՏԱՐՈՒԱՅ (ԾՐԱԳՐԱԾ) ՎԵՐՋԻՆ ՀՐԱՊԱՐԱԿԱՅԻՆ ՀԱՆԴԻՊՈՒՄԸ
ԴԵԿՏԵՄԲԵՐԻ 28-ԻՆ` ժամը 14։30-ին։ ԵՂԱՆԱԿԻՑ ԱՆԿԱԽ՝ ԵՍ ԱՅՆՏԵՂ ԵՄ։ ԷՍ ԱՐՀԵՍՏԱԿԱՆ ՑՐՏԵՐԸ ՄԵՐ ՍՐՏԵՐԸ ԹՈՂ ՉՍԱՌԵՑՆԵՆ։

Հայ ժողովրդի հիմնական մասը, հաւանաբար, հարցին անդրադառնալով առողջ բանականութեան տեսանկիւնից, համեմատելով տնտեսական կարողականութինները, արժեքային համակարգերը (դրանց առկայութիւնն ու բացակայութիւնը) եւ Հայաստանի ինքնիշխանութեան ապահովման երաշխիքները, իր հոգու խորքում դէմ է տրամադրուած Մաքսային Միութիւն կոչուած նախագծին։ Յոկտեմբերին եւ այս օրերին համահայաստանեան ընդգրկումով իրականացուած անաչառ գիտական հարցումների արդիւնքներն այդ են ցոյց տալիս։

Միաժամանակ, Հայաստանեան կուսակցութիւններից միայն մի քանիսն են ազդարարել, որ դէմ են Մաքսային Միութեանը։ Ուշագրաւ է, որ գազի վերաբերեալ համաձայնագրերի դէմ կռիվ տուող խորհրդարանական 4 ուժերից երեքը ուղղակի կամ անուղղակի նոյնպէս կողմ են Հայաստանի անդամակցութեանը ՄՄ-ին։ Բացառիկ անհեթեթ իրավիճակ. դէմ են ՄՄ հետեւանք, ՄՄ-ի ածանցեալ, ՄՄ-ի առարկայական դրսեւորում եւ շարունակութիւն գազի համաձայնագրերին, սակայն կողմ են այդ ամենը ծնող ՄՄ-ին (ռուսական իմպերիալիստական մտքի դրսեւորմանը)։ Տունը զուգարան դարձնելուն կողմ են, բայց այդ զուգարանի օգտագործմանը՝ դէմ։

Շարունակւում է «կգբ» գաղտնի գործակալական ցանցի ինքնաբացայայտումը՝ «լիւստրացիան»։ Երբ տարիներ առաջ մի յայտնի ռուս պաշտոնեայ ազդարարում էր, որ Հայաստանի հետ ռուսական կայսերապշտութիւնը որեւէ խնդիր չունի, ոմանց թւում էր, թէ դա հերթական պոռոտախօսութիւն է։ Մեր օրերում պարզ դարձաւ, որ, իսկապէս, 7 տասնեակից աւելի հայաստանեան կուսակցութիւնները, աննաշան բացառութեամբ, ռուսական իմպերիալիզմի գրպանում են (աջ կամ ձախ)։ Նրանց տրամադրութեան տակ է եւ նրանց է սպասարկում նաեւ հայ «ազատ մամուլը»(միայն մի քանի բացառութիւններով)։

Այսօր ինձ հրաւիրած մամուլի ակումբներից մէկում ասուլիսին միայն երեք լրագրողների ներկայութիւնը ակումբի պատասխանատուն բացատրեց բազմաթիւ այլ միջոցառումների ու ասուլիսների առկայութեամբ։ Իրականում, պիտի յիշենք, որ Հայաստանում անկախ լրատուամիջոցների թիւը գնալով նուազում է՝ լաւագոյն դէպքում փոխարինուելով «կուսակցական ազատ մամուլով»։

Աշխարհում կուսակցութիւնները միմիանց ընդդիմանում են նախ եւ առաջ «ստրատեգիաւան» կողմնորոշումներով։ Հայաստանում հակառակն է. խորհրդարանում իրար հետ օրախնդիր հարցով մարտնչում են «ստրատեգիական» խնդրում՝ ՄՄ հարցում իրար դաշնակից ուժերը։
Ես մենակ էլ պիտի անեմ եւ կանեմ իմ անելիքը եւ դա շարքային ակնահաճոյ խենթութիւն չի լինի, սակայն սպասում եմ, որ չբթացածները չգոհանան դիտորդական-սպսողական հոգեվիճակով։ Իմանանք, որ դա մեր օգտին չէ։ Արդէն ՄՄ-ին դէմերի տոկոսը նուազում է, որ նոյնն է՝ նուազում է ազատ ու անկախ Հայաստանի հաւատաւորների բանակը։ Մի բան, որ հայութեան վերջին կռուանն է, մեր վերջին պաշտպանագիծը»։