ԱՄՆ-ը Եվրոպայից դուրս է բերում 10 հազար զինվորների

ԱՄՆ 17 Փետրվար, 2012 20:56

ԱՄՆ–ի պաշտպանական նոր ռազմավարության շրջանակներում պաշտպանության նախարար Լեոն Պանետան հայտարարել է, որ 10 հազար զինվորով կրճատում են Եվրոպայում գտնվող ամերիկյան զորքերի թվաքանակը։ Պենտագոնի ղեկավարը գերմանացի իր գործընկերոջ հետ հանդիպման ժամանակ հայտնել է, որ Միացյալ նահանգները մինչև 2014 թվականը մտադիր է դուրս բերել ամերիկյան զորքերի 170–րդ և 172–րդ բրիգադը, ինչի հետևանքով Եվրոպայում ԱՄՆ ռազմական ներկայությունը մի քանի հազար զինծառայողով կնվազի։

Պանետան նշել է, որ զինուժի մասնակի դուրսբերումը չի սպառնում տարածաշրջանի՝ մասնավորապես Գերմանիայի անվտանգությանը, «քանի որ այդ երկիրն ամերիկյան զորքերի հետ միասին պատերազմում է Աֆղանստանում»։

Աշխարհում ամերիկյան ռազմական ներկայացվածության կրճատումն իրականացվում է ԱՄՆ նոր պաշտպանական ռազմավարության շրջանակներում։ «Տարածաշրջանային վերադասավորությունների նպատակով մենք շարունակում ենք Մերձավոր Արևելքի և Ասիա–խաղաղօվիանոսյան տարածաշրջաններում նախադրյալներ ստեղծել և մեծացնել ամերիկյան ռազմական ներկայությունը։ Այո, մենք այնտեղ ունենալու ենք հակաօդային և ռազմածովային պաշտպանության համակարգեր, բայց փորձը ցույց է տալիս, որ ցանկացած հակամարտության ժամանակ պետք է կարողանանք օգտագործել ցամաքային ուժերի հնարավորությունները»,– ասել է Պանետան։

Գերմանիայի օրինակով ԱՄՆ–ի ռազմական օժանադակությանն էին դիմել մերձբալթյան հանրապետությունները, այն բանից հետո, երբ Ռուսաստանի նախագահ Դմիտրի Մեդվեդևը սպառնացել էր պատասխան գործողություններ ձեռնարկել մերձբալթյան երկրներում՝ ԱՄՆ–ի կողմից հակաօդային պաշտպանության համակարգեր տեղադրելու դեպքում։ Սակայն ԱՄՆ–ն հայտարարել է, որ մտադիր չէ հրաժարվել ԵվրոՊՐՈ–ներ տեղադրելու իր ծրագրերից, հաղորդում է NEWS.ru-ն։

Թեև Գերմանիայում ԱՄՆ–ն 10 հազարով կրճատում է զինված ուժերի թվաքանակը, սակայն պատրաստվում է Իսպանիայի ջրերում չորս ռազմանավեր տեղակայել, որոնք հագեցած են բազմաֆունկցիոնալ մարտական տեղեկատվության և Aegis կառավարման համակարգերով։

Հաղորդվում է, որ դրանք օգտագործվելու են ոչ միայն ԵվրոՊՐՈ–ների տեղակայման նպատակով, այլև կարող են օգտագործվել Պարսից ծոցի տարածաշրջանում և Արաբական ծոցի երկրներում ԱՄՆ–ի ռազմական նպատակների համար։