Լոնդոնում ավարտվել են օլիմպիական «նարգիլեի» աշխատանքները

Լոնդոնի Օլիմպիական պարկում ավարտվել են 115 մետրանոց ֆուտուրիստական կառույցի` ArcelorMittal Orbit-ի աշխատանքները: Ինչպես հաղորդում է բրիտանական Evening Standard պարբերականը, այն իր բարձրությամբ գերազանցում է Նյու Յորքի Ազատության արձանին և գրեթե հավասար է եգիպտական բուրգերին: 

Օլիմպիական մարզադաշտից ոչ հեռու գտնվող հսկայական մետաղական կառույցի դիզայնի հեղինակը ժամանակակից ամենահայտնի և հաջողակ նկարիչներից մեկն է` Արվեստների թագավորական ակադեմիայի անդամ և Թերների անվան մրցանակակիր ծագումով հնդիկ բրիտանացի Անիշ Կապուրը: 
Կառույցն իրենից ներկայացնում է իրար միացված օլիմպիական օղակների ամբողջություն, որը ոմանց հիշեցնում է «Ամերիկյան բլուրների» ճանապարհը, ոմանց նարգիլե: Կառույցը ներկվել մուգ կարմիր գույնով: «Նարգիլեի» վերևում կանգնեցվել է դիտահրապարակ, որտեղից տեսադաշտ է բացվում Օլիմպիական պարկի և Լոնդոնի արևելյան մասի վրա: 
ArcelorMittal Orbit-ը 22 մետրով բարձր է Ազատության արձանից: Այն նաև իր բարձրությամբ գերազանցում է այնպիսի հայտնի կառույցների, ինչպիսիք են Նելսոնի հուշարձանը Լոնդոնում, Քրիստոսի արձանը Ռիո դե Ժանեյրոյում: 
ԶԼՄ-ների տվյալներով, հուշարձանի վրա ծախսվել է 22.7 մլն ֆունտ: Գումարի մեծ մասը տրամադրել է Մեծ Բրիտանիայի ամենահարուստ մարդը` ծագումով հնդիկ Լաքշմի Միտալը, որի անունով էլ կոչվում է կառույցը: Ֆինանսավորման մյուս մասը տրամադրել են Լոնդոնի իշխանությունները: