ԱՄՆ բարձրագույն պաշտոնյաները մեկնում են Իսրայել՝ Իրանի հարցը քննարկելու

Ազգային անվտանգության հարցերով ԱՄՆ նախագահի խորհրդական Տոմ Դոնիլոնն այսօր կմեկնի Իսրայել։ Դոնիլոնն Իսրայել է մեկնում լրատվամիջոցների կողմից տարածված այն տեղեկությունների ֆոնին, որ Իսրայելը պատրաստվում է հարվածել Իրանի ուղղությամբ։

Սպիտակ տան տարածած մամլո հաղորդագրությունում ասված է, որ Դոնիլոնը Իսրայել է մեկնելու երկրի ղեկավարության հետ մի շարք հարցեր, այդ թվում՝ Իրանի, Սիրիայի և տարածաշրջանի այլ երկրների հետ կապված, քննարկելու նպատակով։

Հատկանշական է, որ ԱՄՆ Ազգային հետախուզության ղեկավար Ջեյմս Կլեպերը ևս հայտարարել է առաջիկայում Իսրայել մեկնելու մտադրության մասին, հաղորդում է «Ռիա նովոստի»-ն։ 

Հիշեցնենք, որ ավելի վաղ ամերիկացի պաշտոնյաները հայտարարել են, որ իրենց ոչինչ հայտնի չէ Իրանի ուղղությամբ հարված հասցնելու Իսրայելի մտադրությունների մասին։