«Հայկական Ժամանակ». Մերկապար պարող դատախազն աշխատանքից ազատվել է

Երեկ աշխատանքից ազատվել է Արմավիրի դատախազության դատախազ Դավիթ Բարոյանը: Մինչ այս մասին հայտնի կդառնար, էլեկտրոնային լրատվամիջոցներում լուրեր տարածվեցին, որ նախօրեին Բարոյանը բավական բուռն երեկույթի է մասնակցել: Ըստ այդ լուրերի, փետրվարի 16-ի գիշերը Մաշտոցի 50 հասցեում գտնվող գիշերային ակումբում անկարգություններ է սարքել, ամբողջովին մերկացել է, բարձրացել բեմի վրա և մերկապարի համար նախատեսված ձողի մոտ պարել, հետո էլ ջարդել է ակումբի գույքը: Ակումբի աշխատակիցները ոստիկանություն են կանչել, ինչից հետո նա դուրս է եկել փողոց և, ականատեսների վկայությամբ, սկսել սեռական բնույթի գործողություններ կատարել և հայհոյել: Երեկ օրվա երկրորդ կեսին ՀՀ գլխավոր դատախազությաունը հաղորդագրություն տարածեց, որով ըստ էության հաստատեց միջադեպի փաստը:

«2012 թվականի փետրվարի 17-ին ստացվել է ահազանգ Արմավիրի մարզի դատախազության աշխատակցի կողմից դատախազին ոչ հարիր վարքագիծ դրսևորելու վերաբերյալ, ինչը հաստատվել է: Պարզվել է, որ Արմավիրի դատախազության դատախազ Դացիթ Բարոյանը 2012 թվականի փետրվարի 16-ի լույս 17-ի գիշերն ընկերոջ հետ միասին գնացել է իր բնակության վայրին մոտ գտնվող գիշերային ակումբ, որտեղ չարաշահել է ալկոհոլը և թույլ տվել դատախազին ոչ հարիր վարքագիծ»,-նշված է հաղորդագրության մեջ: Ի դեպ, Բարոյանը իր պահվածքի հետևանքով քրեական հետապնդման չի ենթարկվի: Եվ ոստիկանությունից, և հատուկ քննչական ծառայությունից հայտնեցին, որ միջադեպի կապակցությամբ նյութեր չեն նախապատրաստվում, քրեական գործ չի հարուցվել: