Ռուսաստանը և Չինաստանը մասնակցելու են «Սիրիայի բարեկամ երկրներ» կոնֆերանսին

Ռուսաստանը մասնակցելու է «Սիրիայի ընկերներ» միջազգային կոնֆերանսին, որը տեղի է ունենալու փետրվարի 24–ին, Թունիսում։ Այս մասին հաղորդել է Թունիսի արտգործնախարար Ռաֆիկ Աբդեսալյամը։

«Ռուսաստանը և Չինաստանը կոնֆերանսին մասնակցելու հրավերներն արդեն ստացել են», – ասել է նախարարը։ Ըստ նրա, ոչ ոք մտադիր չէ «այդ երկրներին հեռու պահել Սիրիայի հարցով որոշումներ կայացնելուց»։ 

Նախարարը նաև նշել է, որ համաժողովին մասնակցելու են Արաբական երկրների լիգայի անդամ բոլոր պետությունների ղեկավարները, եվրոպական երկրների ներկայացուցիչներ, Իսլամական համագործակցության կազմակերպության որոշ ներկայացուցիչներ, «ինչպես նաև տարածաշրջանում մեծ ազդեցություն ունեցող այնպիսի երկրներ, ինչպիսիք են ԱՄՆ–ը, Ռուսաստանը, Չինաստանը և Հնդկաստանը»։

Աբդեսալյամը նաև հայտնել է, որ առաջիկա համաժողովի նպատակը «Սիրիայի ներկա կառավարող ռեժիմի նկատմամբ ճնշումներն ավելացնելն է»։ Միևնույն ժամանակ, Աբդեսալյամը նշել է, որ Թունիսը կտրականապես դեմ է Սիրիայում ռազմական միջամտությանը և «երբեք այլ արաբական պետության դեմ ռազմական գործողությունների սկսվելու հարցում չի լինի առաջամարտիկ»։ Նա նաև նշել է, որ այդ համաժողովին չի մասնակցելու Սիրիայի ընդդիմադիր Ազգային խորհուրդը, թեև այդ համաժողովի օրակարգային գլխավոր հարցը լինելու է Սիրիայի ընդդիմադիր ուժերի միավորումը։

Թունիսը «Սիրիայի ընկերներ» միջազգային կոնֆերանս անցկացնելու նախաձեռնությամբ առաջին անգամ հանդես է եկել անցյալ շաբաթ Կահիրեում՝ Սիրիայի հարցով Արաբական երկրների լիգայի արտգործնախարարների հանդիպման ժամանակ։

Ռուսաստանի ԱԳՆ-ը «Սիրիայի ընկերներ»–ը օրինակարգ չի համարում և զգուշորեն է վերաբերվում հակամարտությունների կարգավորման նման ձևաչափի հանդիպումներին։ Ավելի վաղ Ռուսաստանի արտգործնախարարության խոսնակ Ալեքսանդր Լուկաշևիչը հայտարարել էր, որ Մոսկվան դեմ է ցանկացած ֆորմատի հանդիպումներին, որոնց նպատակն է ավելացնել արտաքին ճնշումները Սիրիայի ներքին խնդիրներին։

«Ռուսաստանը պարզաբանում է ակնկալում Արաբական երկրների լիգայի կողմից՝ «Սիրիայի ընկերներ» ձևաչափի հանդիպում կազմակերպելու կապակցությամբ», – ասել է ՌԴ արտգործնախարար Սերգեյ Լավրովը՝ Արաբական միացյալ էմիրությունների իր գործընկերոջ հետ հանդիպման ժամանակ։

«Մենք կցանկանայինք պարզաբանումներ ստանալ այդ համաժողովի բովանդակային մասով, և եթե այդ համաժողովն իսկապես միավորում է բոլոր սիրիացիներին, ապա, կարծում եմ, որ դա ճիշտ մոտեցում է», – հավելել է նախարարը։