Իրանն աշխարհը տանում է մի նոր «սառը պատերազմի» և սպառազինությունների մրցավազքի. Մեծ Բրիտանիայի ԱԳՆ

Իրանի միջուկային սպառազինությունների մրցավազքը Մերձավոր Արևելքում ավելի մեծ սպառնալիք է, քան ԽՍՀՄ և ԱՄՆ-ի միջև սառը պատերազմն էր։ Այս մասին հայտարարել է Մեծ Բրիտանիայի արտաքին գործերի նախարար Ուիլյամ Հեյգը՝ «Daily Telegraph»–ին տված հարցազրույցում։

«Սա մշուշոտ ճգնաժամ է։ Նրանք (իրանցիները) ակնհայտորեն շարունակում են իրենց միջուկային ծրագիրը։ Եթե նրանք միջուկային զենքի ստեղծումն ավարտեն, ես կարծում եմ, որ Մերձավոր Արևելքի երկրները նույնպես կցանկանան օգտագործել իրենց միջուկային զենքի կարողությունները։ Իսկ հետո սկսում է միջուկային զենքի տարածման առավել լուրջ փուլը, որն իր ստեղծման պահից սկսած կապակայունացնի իրավիճակը Մերձավոր Արևելքի երկրներում, ինչն էլ իր հերթին Մերձավոր Արևելքի տարածաշրջանում Սառը պատերազմի առաջացման առիթ կարող է դառնալ»,– ասել Հեյգը։

Նա նաև նշել է, որ Մեծ Բրիտանիայի կառավարությունն Իսրայելին կոչ է անում չհարձակվել Իրանի վրա, քանի որ այն լուրջ բացասական հետևանքների կհանգեցնի։  

«Մենք չենք պաշտպանում Իրանի դեմ ռազմական գործողություններ սկսելու միտքը։ Մենք բազմիցս ասել ենք, որ չենք պաշտպանում բռնի մեթոդները, այլ պաշտպանում ենք Իրանի դեմ պատժամիջոցներ և ճնշումներ կիրառելու ռազմավարությունը և խնդիրը բանակցությունների միջոցով կարգավորելու գաղափարը», – ասել է Մեծ Բրիտանիայի արտգործնախարարը։

Իրանը մերժում է միջազգային հանրության մեղադրանքներն առ այն, ըստ որի Թեհրանի միջուկային ծրագիրն ատոմային ռումբ ստեղծելուն է միտված։ Ուրբաթ օրը ԱՄՆ-ն և ԵՄ-ն զգուշավոր լավատեսություն էին հայտնել Իրանի ներկայացուցիչ Սաիդ Ջալիլիի Իրանի և Արևմուտքի միջև միջուկային ծրագրի շուրջ երկխոսությունը վերսկսելու հայտարարության վերաբերյալ։