«Ավտոբուսը հրազենային կրակի հեղեղից ուղղակի մաղ էր դարձել»

ՀՀ Նախագահի նախկին թեկնածու Արման Մելիքյանը ֆեյսբուքյան իր էջում գրել է.

«Մեր գլխովն անցածի շատ առանձին դրվագներ աստիճանաբար ծածկվում են մշուշով ու մոռացության մատնվում: Այդպիսի դրվագներից է Վոսկեպարի միլիցիայի ջոկատի մարտիկների վրա Ադրբեջանում տեղակայված խորհրդային 7-րդ բանակի ստորաբաժանման կողմից գործված հանցավոր դարանակալ հարձակման ողբերգական միջադեպը: Հայ միլիցիոներներին գյուղ տեղափոխող ավտոբուսը խաչաձև կրակի տակ ընկավ լեռնային ճանապարհի ոլորանում՝ ջոկատի անձնակազմի մեծ մասը զոհվեց, իսկ սակավաթիվ ողջ մնացածներին խորհրդային զինվորները իրենց հետ գերի տարան: Եթե չեմ սխալվում, գերի ընկածների մեջ ծանր վիրավոր էլ կար:

Ավելի ուշ գերի ընկածներին հաջողվեց ետ բերել գերությունից: Մեր միլիցիոներները Վոսկեպար էին գնում ոչ թե հարձակվողական հատուկ ռազմական գործողություն իրականացնելու, այլ սովորական պարեկային ծառայության իրենց հերթափոխին հասնելու համար, ինչի մասին տեղի խորհրդային զինվորական հրամանատարությունն, անկասկած, քաջատեղյակ էր:

Ավտոբուսը հրազենային կրակի հեղեղից ուղղակի մաղ էր դարձել, իսկ սրահում արյան լճակներ էին գոյացել: Կատարվածի մեղավորները՝ հրաման տվողներն ու կատարողներն այդպես էլ ի հայտ չեկան, սակայն հստակ էր այլևս, որ պատերազմի դռները բացվել են ու մեզ ուզում են ահաբեկել: Այդ լեռնային կածան-ճանապարհին դարանակալած ահաբեկիչներն ադրբեջանցիները չէին»: