Հայաստանը մասնակցեց Մինսկի գրքի միջազգային 19-րդ ցուցահանդես-տոնավաճառին

Գիտություն և Մշակույթ 18 Փետրվար, 2012 21:57

2012 թ. փետրվարի 8-12-ը Բելառուսի «БЕЛЭКСПО» ցուցահանդեսային ազգային կենտրոնում անցկացվել է գրքի միջազգային 19-րդ ցուցահանդես-տոնավաճառը, որին ավանդաբար մասնակցում է Հայաստանի Հանրապետությունը: Այս մասին ասված է ՀՀ Մշակույթի նախարարության պաշտոնական կայքում զետեղված հաղորդագրության մեջ։

Հայկական պատվիրակությունը գլխավորել է «Գրքի և հրատարակչական գործի կենտրոնի» տնօրեն Էդվարդ Միլիտոնյանը: Պատվիրակության կազմում Մինսկի ցուցահանդեսին մասնակցել են նաև «Անտարես» տպագրատան տնօրեն Արմեն Մարտիրոսյանը, նկարիչ-քանդակագործ Արարատ Սարգսյանը, բանաստեղծ, գրականագետ Աշոտ Գաբրիելյանը և այլք:

Հայ գրատպության 500-ամյա հոբելյանի, ինչպես նաև ՅՈՒՆԵՍԿՕ-ի կողմից Երևանը 2012 թ. գրքի համաշխարհային մայրաքաղաք հռչակվելու կապակցությամբ ցուցահանդեսի կազմակերպիչները Հայաստանին հնարավորություն են ընձեռել հանդես գալու «կենտրոնական ցուցադրողի» կարգավիճակով՝ հայ գրատպության անցյալը և ներկան լավագույնս ներկայացնելու հնարավորությամբ: Ի դեպ «կենտրոնական ցուցադրողի» կարգավիճակը ցուցահանդեսի կազմակերպիչները կիրառել են առաջին անգամ:

Հայաստանյան տաղավարում ներկայացվել է 600-ից ավելի ցուցանմուշ՝ ՀՀ-ում տպագրված գրականություն, ամսագրեր, հանդեսներ: Հայկական տաղավարի շնորհանդեսը կայացել է փետրվարի 11-ին: Ողջույնի խոսքով հանդես են եկել Բելառուսի Հանրապետությունում Հայաստանի Հանրապետության արտակարգ և լիազոր դեսպան Արմեն Խաչատրյանը, բելառուս բանաստեղծ Դրանկո-Մաիսյուկը: Այնուհետև բեմահարթակը տրամադրվել է հայ համայնքի «Էրեբունի» պարային համույթին: Ցուցահանդեսի մասնակիցներին և այցելուներին հանդիսությունների դահլիճում ներկայացվել է հայ գրատպության 500-ամյակի և Երևանը գրքի համաշխարհային մայրաքաղաք ճանաչվելու կապակցությամբ նկարահանված ֆիլմ: Բելառուսի հայազգի երեխաներին ներկայացվել է մանկական պատկերազարդ գրականություն: Հատկապես տպավորիչ է եղել հայկական պատվիրակության ներկայացուցիչ, ՀՀ վաստակավոր նկարիչ Արարատ Սարգսյանի տեղում հնագույն մեթոդներով թղթի ստացումն ու օֆորտների և կավե սալիկների պատրաստումը:
Ցուցահանդեսի օրերին կազմակերպվել են նաև շնորհանդեսներ, կլոր սեղաններ, հանդիպումներ են կայացել Բելառուսում հրատարակվող հայալեզու «Անիվ» հանդեսի և ռուսերեն հրատարակվող «Միասին» թերթի խմբագրակազմերի հետ, տեղի են ունեցել զրույց-քննարկումներ գրքի և գրականության վերաբերյալ, կայացել են երկխոսություններ: Շփումների ընթացքում ձեռք են բերվել ստեղծագործական, հրատարակչական նոր կապեր ու գործնական պայմանավորվածություններ: Ցուցահանդեսի շրջանակներում հայկական պատվիրակությունը մասնակցել է նաև ԱՊՀ երկրների գրապալատների, գրքի ցուցահանդեսների կազմակերպիչների հավաքին, հանդիպումներ են եղել Բելառուսի նախագահի աշխատակազմի ղեկավարի, մշակույթի և ինֆորմացիայի նախարարների, Մինսկի քաղաքապետի, ինչպես նաև գրողների միության քարտուղարների և նկարիչների միության նախագահի հետ:

Մինսկի ցուցահանդես-տոնավաճառում ներկայացված պետական պատվերով և աջակցությամբ հրատարակված թվով 203 անուն գիրք և տեսալսողական սկավառակներ հանձնվել են Բելառուսում Հայաստանի Հանրապետության դեսպանությանը: Հայ համայնքին է ներկայացվել «Լիտոպեդիա» հայերեն էլեկտրոնային բանասիրության հանրագիտարանը, որը պարունակում է գրականությանը և լեզվին վերաբերող բազմաբովանդակ տեղեկություններ:

ՀՀ մշակույթի նախարարությունը ցուցահանդեսին ակտիվորեն մասնակցելու և բազմաբովանդակ էքսպոզիցիայի համար արժանացել է պատվավոր մրցանակի, իսկ ՀՀ-ից ժամանած պատվիրակության անդամները՝ պատվոգրերի: Ցուցահանդեսի անցկացմանը և կազմակերպչական աշխատանքներին ակտիվ ներգրավվածություն և աջակցություն են ցուցաբերել Բելառուսում Հայաստանի Հանրապետության դեսպանության աշխատակիցները, ինչպես նաև տեղի հայ համայնքի ներկայացուցիչները: