«Պետք է անշեջ կրակի նման վառ պահենք մեր հերոս զինվորների հիշատակը»

Ռոբերտ Մելքոնյանը ֆեյսբուքյան իր էջում գրել է.

«Հունվարի 19-ի լույս 20-ի գիշերը ղարաբաղա-ադրբեջանական շփման գծում հերոսաբար զոհված սերժանտ Արմեն Հովհաննիսյանը իսկապես մեր ժամանակների հերոսն է:

Բնականաբար միանում եմ այն բոլոր խոսքերին, որ արտահայտում են մեր քաղաքացիները' անկախ տարիքից, սեռից, պաշտոնից, մասնագիտությունից…Գլուխ եմ խոնարհում նրա ընտանիքին, նրա մանկավարժներին մեր այս հակասական իրականության մեջ նման զավակ, նման քաղաքացի դաստիարակելու համար…Սակայն, միաժամանակ ուզում եմ, որ մենք' բոլորս, չմոռանանաք Արմենին, նրա ընտանիքին…

Ցավակցություններ, գովասանքներ, մեդալ, մոմավառություններ, խոսքեր…

Դրանք կարևոր են, բայց հույս ունեմ, որ ՀՀ ՊՆ-ն, պետական մյուս կառույցները, հասարակական կազմակերպությունները, մենք' բոլորս, այդ և համանման մյուս ընտանիքներին պարտավոր ենք մշտապես պահել հոգատարության և ուշադրության կենտրոնում: Գուցե անհրաժեշտ է պետական հոգածության ինչ-որ ծրագիր, կառավարության որոշում նման ընտանիքներին օժանդակելու համար: Պետք է մտածել, պետք է անպայման մտածել այդ ուղղությամբ... Թե չէ ստացվում է այնպես, որ մի որոշ ժամանակ անց մոռանում ենք…Մոռանում ենք բոլորս, մոռանում, որ նրանք' նման զինվորները, ծառայում և զոհվում են մեր Հայրենիքի, բոլորիս խաղաղ ու անվտանգ կյանքի համար…

Պետք է անշեջ կրակի նման վառ պահենք մեր հերոս զինվորների հիշատակը, ճանաչենք անուն առ անուն, այլապես մենք լիարժեք պետություն, լիարժեք հասարակություն չենք դառնա…»: