Սերբիայում ձերբակալվել է 15 իսլամիստ՝ կապված Սարաևոյում ԱՄՆ դեսպանատան վրա կատարման հարձակման հետ

Սերբիայի հարավում ձերբակալվել է 15 մարդ, որոնք կասկածվում են Բոսնիա և Հերցոգովինայում ԱՄՆ դեսպանատան վրա կատարած հարձակման հետ առնչություն ունենալու մեջ , հայտնում է «Ազատություն» ռադիոկայանը։

Ոստիկանությունը խուզարկություններ է կատարել Նովի–Պազառ, Սենիցա և Տւտին քաղաքներում։

Բոսնիայում ԱՄՆ դեսպանը հայտարարել է, որ դեսպանատունը կշարունակի աշխատել՝ չնայած բոլոր սպառնալիքներին։

Ավելի վաղ Սարաևոյում ձերբակալվել էին հարձակման հետ կապ ունեցող ևս երկու մարդ։ Ըստ ոչ պաշտոնական տվյալների հարձակում գործած անձանցից մեկն սպանվել է, մեկը՝ վիրավորվել, իսկ երրորդին հաջողվել է փախչել։

Հայտնի է, որ Սարաևոյում ԱՄՆ դեսպանատան վրա կատարված հարձակման մասնակիցները ծայրահեղ իսլամիստական կազմակերպության անդամ են եղել։

Նշենք, որ նախկին Հարավսլավական այս հանրապետությունում քաղաքացիական պատերազմի ընթացքում նկատելիորեն ուժեղացել էր ծայրահեղ իսլամիստական «վահաբիզմ» ուսմունքի ազդեցությունը։

Հիշեցնենք, որ Բոսնիա և Հերցոգովինայում ԱՄՆ դեսպանատան վրա հարձակումը տեղի էր ունեցել տեղական ժամանակով 15։40 (Երևանի ժամանակով՝ 18։40)։ Հարձակման հետևանքով վիրավորվել էր ոստիկանության երկու աշխատակից։ Դեսպանատան աշխատակազմում տուժողներ չեն եղել։