Իրանը «վեցնյակին» առաջարկում է բանակցությունները շարունակել Ստամբուլում

Իրանը կողմ է միջազգային միջնորդների «վեցնյակի» հետ միջուկային խնդրի շուրջ բանակցությունները վերսկսելուն։ Այդ մասին հայտարարել է Իրանի արտաքին գերատեսչության ղեկավար Ալի Ակբար Սալեհին։ 

Ինչպես հաղորդում է NEWSru.com-ը, Սալեհին առաջարկել է բանակցություններն անցկացնել Ստամբուլում։ Նա նաև հայտնել է, որ Իրանը սպասում է Եվրամիության պատասխանին։ 

Ավելի վաղ հայտնի էր դարձել, որ Իրանը Եվրամիության՝ արտաքին հարաբերությունների հարցերով գերագույն հանձնակատար Քեթրին Էշթոնին նամակ էր հղել՝ առաջարկելով շարունակել դադարեցված բանակցությունները, քանի որ Թեհրանն ունի «նոր նախաձեռնություններ», որոնք պատրաստ է ներկայացնել գործընթացի բոլոր մասնակիցներին։ 

Իրենց հերթին, ԱՄՆ և ԵՄ արտաքին գերատեսչությունների ղեկավարները զուսպ լավատեսություն էին հայտնել Իրանի այդ քայլի վերաբերյալ։