Իրանի միջուկային օբյեկտների հրթիռակոծումը խելամիտ չէ. ԱՄՆ գեներալ

Իրանի միջուկային օբյեկտների հրթիռակոծումը խելամիտ չէ։ ԱՄՆ նախագահ Բարաք Օբամայի վարչակազմի այս դիրքորոշումն այսօր կրկին բարձրաձայնել է ԱՄՆ օդուժի շտաբի պետերի կոմիտեի ղեկավար, գեներալ Մարտին Դեմպսին, հաղորդում է «Ռիա նովոստի»-ն։ 

Նրա խոսքերով, Իսրայելն ունի նման հարված հասցնելու հնարավորություն, ու հավանաբար նման քայլը իրանյան միջուկային ծրագրի իրագործումը «մի երկու տարով» կհետաձգի, սակայն «պոտենցիալ օբյեկտներից որոշներն իսրայելցիները չեն կարողանա ոչնչացնել»։ 

Օբամայի վարչակարգին նաև անհանգստացնում է, որ նման գործողությունների հետևանքով Իրանն իր հերթին կհրթիռակոծի Պարսից ծոցի շրջանում կամ Աֆղանստանում տեղակայված ամերիկյան զինված ուժերը։ 

Ամերիկայում կարծում են, որ Թեհրանը ժամանակի ընթացքում էլ ավելի կընկճվի կիրառվող տնտեսական պատժամիջոցներից, ուստի Իրանի միջուկային ամբիցիաների զսպման ամենանպատակահարմար ուղին հենց այդ պատժամիջոցների հետևողական կիրառումն է։