Թուրքահայ լրագրող Ջևաթ Սինեթը քննադատել է Հայոց ցեղասպանությունը ժխտող թուրք վիպասանին

Թեպետ վերջին տարիների ընթացքում Թուրքիայի հասարակության շրջանում կա որոշակի տեղաշարժ Հայոց ցեղասպանության հարցի շուրջ ընկալումներում, այդուհանդերձ կան մտավորականները, ովքեր հրաժարվում են առերեսվել պատմական իրականությանը: Նման մտավորականների թվին պետք է դասել թուրք վիպասան Այշե Քուլինին, ով, մասնակցելով թուրքական CNN Turk հեռուստաընկերությամբ հեռարձակվող հաղորդումներից մեկին, ասել է, թե իրեն չի համարում պատասխանատու Հայոց ցեղասպանության և հայերի տեղահանման համար: Այս մասին հայտնում է Aykiridogrular.com-ը:

«Ես հայերին շատ եմ սիրում, սակայն դա տեղահանություն էր: Դժվար է պատերազմական դեպքերը ցեղասպանություն անվանելը: Մենք հենց այնպես չենք գնացել և նրանց սպանել' այնպես, ինչպես տեղի ունեցա հրեաների դեպքում»,-ասել է Քուլինը' նշելով, որ համարում է իրեն օսմանյան պետության ժառանգորդը:

Թուրք վիպասանի այս խոսքերն արդեն արձագանք են գտել համացանցում: Դրանք քննադատել է թուրքահայ լրագրող Ջևաթ Սինեթը: Aykiridogrular.com կայքում հրապարակած հոդվածում Սինեթը հարց է տալիս Քուլինին, թե որտեղ են այժմ հայերը, ինչու են նրանք անհետացել այդ աշխարհագրական միջավայրից:

«Հանգիստ թողնենք հայ ժողովրդին. ոչ մի ժողովուրդ արժանի չէ ցեղասպանության և տեղահանման: Եթե նման հայտարարություն աներ սովորական, շարքային մի մարդ, ապա կհասկանայի, կասեի, որ բանիմաց չէ, չգիտի: Սակայն չկա ավելի սարսափելի բան, քան այն, որ նման բան ասում է գրողը»,- ցավով նշել է Սինեթը: