Գիտական լրագրության խմբի հերթական սեմինարը նվիրված էր Արեւմտյան Հայաստանի հուշարձաններին

Հոկտեմբերի 29-ին ՀՀ Գիտությունների ազգային ակադեմիայի Գիտակրթական կենտրոնում կայացավ գիտական լրագրության խմբի հերթական սեմինարը:

Այն նվիրված էր ԵՊՀ պատմության ֆակուլտետի ուսանողների եւ դասախոսների շուրջ 120 հոգուց բաղկացած խմբի 2011թ. հունիսի 22-26-ին Արեւմտյան Հայաստան կատարած այցելությանը:

Բանախոսներն էին ֆակուլտետի շրջանավարտներ, պատմաբան Լուսինե Մարգարյանը եւ մշակութաբան Անի Աղաջանյանը: Նրանք ներկայացրեցին իրենց այցելության մանրամասները եւ պատմեցին պատմական Հայաստանի Բայազետ, Կարս, Անի եւ Վան քաղաքների պատմաճարտարապետական կոթողների մասին:

Ճանապարհորդությունը կազմակերպվել էր ԵՊՀ պատմության ֆակուլտետի ղեկավարության նախաձեռնությամբ` պատմության, մշակութաբանության եւ արվեստաբանության բակալավրիատի եւ մագիստրատուրայի շրջանավարտների համար։ Ճանապարհորդության վերջնանպատակն էր Անիում շրջանավարտներին դիպլոմների հանդիսավոր հանձնումը։