«Առավոտ». Հասարակությունն այլ հենարան, քան ՀԱԿ-ն է, չունի. Արամ Սարգսյան

«Հանրապետություն» կուսակցության առաջնորդ Արամ Սարգսյանի խոսքերով՝  Սերժ Սարգսյանը «ղազագրեր» ստորագրել է պարտադրում իր գործընկերներին: «Առավոտ»-ի հետ զրույցում, պատասխանելով այն հարցին, թե արդարացվա՞ծ են խորհրդարանական ընտրություններում մեծամասնություն ձեռք բերելու ՀԱԿ-ի հավակնությունները, ասել է. «Հասարակությունն այլ հենարան, հույսի այլ տեղ, քան ՀԱԿ-ն է, չունի: Բոլոր այն ուժերը, ովքեր երկրի իրավիճակը գնահատում են այսպես, տեսնում են, որ իշխանություններն այս տարբերակով  անընդհատ պիտի վերարտադրվեն, ովքեր խնդիր են դնում ոչ թե պատգամավոր դառնալու, այլ երկրում իրական փոփոխություններ անելու, միավորվել են ՀԱԿ-ում, և քարոզարշավը երբ սկսվեց, երբ երևացին բևեռները, երևաց, թե ովքեր են իրար դեմ պայքարում, ակնհայտ է դառնում, որ կա իշխանական բևեռ՝ իր կոալիցիայով և իրեն սպասարկող որոշակի քաղաքական ուժերով, և կա ՀԱԿ: Հասարակությունը սկզբում ֆուտբոլ դիտողի նման դիտելու է ու իր համակրանքը լինելու է ՀԱԿ-ի կողմը: Վերջում ինքն էլ իրեն թիմի անդամ է համարելու և ՀԱԿ-ի հետ լցվելու է հրապարակներ: Ու այդ ժամանակ իշխանության խնդիրը շատ ծանր է լինելու»:

-Մարտի 1-ին նախատեսված է ՀԱԿ-ի այս տարվա առաջին հանրահավաքը.դա կլինի հանրահավաքային շրջանի բացու՞մը, և ո՞րն է լինելու այդ հանրահավաքի «մեխը»: 

Պատասխանելով հարցին, թե որն է լինելու մարտի 1-ի հանրահավաքի «մեխը», Արամ Սարգսյանն ասել է. «Դա կլինի քարոզարշավի սկիզբ այս խորհրդարանական ընտրությունների, որը ես նախագահական ընտրություններ եմ համարում: Եվ ոչ միայն ես, այդպես է համարում նաև Սերժ Սարգսյանը, որը իր համար «ղազագրեր» ստորագրել է պարտադրում իր գործընկերներին: Ես ուզում եմ, որ ժողովուրդն էլ այս ընտրությունը նախագահական համարի, որովհետև այստեղից սկսած՝ ձևավորվելու է իշխանությունը, ու այդ մոտեցումով գա մարտի 1-ի հանրահավաքին: Դա լուրջ հանրահավաք է, լուրջ գործընթացների սկիզբ, եթե կուզեք՝ նաև փոփոխությունների սկիզբ, նախ՝ հոգևոր, հետո՝ մտավոր, հետո կդառնա ֆիզիկական ու իրական»: