«Հայակական Ժամանակ». Հայաստանի ավտոպարկը ծերանում է

ՀՀ ՊԵԿ մաքսային ծառայության հրապարակած տվյալների համաձայն, 2011 թվականին Հայաստան է ներկրվել 29 հազար 388 հատ ավտոմեքենա: Սա մոտ 9 հազարով ավելի է, քան 2010 թվականաին ներկրված մեքենաների քանակը, սակայն զիջում է 2007-ի և 2008-ի ցուցանիշները, համապատասխանաբար, 5 հազարով և 12 հազարով: Բայց ամենաուշագրավն այն է, որ կտրուկ մեծացել է էժան՝ մինչև 5 հազար դոլար արժողությամբ մեքենաների ներկրումը: 2011 թվականին ներկրված այդպիսի էժան մեքենաների թիվը կազմել է մոտ 16 հազար, այսինքն՝ ներկրված ընդհանուր մեքենաների կեսից ավելին: Այդպիսի բան չէր արձանագրվել վերջին 5 տարիներին: Այլ կերպ ասած, ներկրված մեքենաների թիվը աճում է հիմնականում հին, մաշվածության բարձր մակարդակ ունեցող մեքենաների ներկրման հաշվին: Իսկ դա նշանակում է, որ Հայաստանի «ավտոպարկը» ծերանում է, ինչը նվազեցնում է երթևեկության անվտանգությունը: Իրավիճակն արտացոլում է մաքսային ոլորտում իրականացվող քաղաքականությունը. խնդիրն այն է, որ սահմանելով ներկրվող մեքենաների մաքսազերծման աննորմալ բարձր վճարներ՝ նվազագույնը 32%, կառավարությունը ստիպում է մարդկանց հնարավորինս էժան ու մաշված մեքենաներ ներկրել: Արդյունքում ստացվում է, որ  քանակով շատ, բայց որակով ցածր մեքենաներ են ներկրվում Հայաստան: Թերթը նկատում է նաև, որ մաքսազերծման բարձր վճարների սահմանումը չի նպաստում բյուջեի արդյունավետ համադրմանը: 2011 թվականին ներկրված ամեն մի մեքենայի մաքսազերծումիցպետբյուջե է գանձվել միջինը մեկ միլիոն 90 հազար դրամ: Սա ամենացածր ցուցանիշն է վերջին 5 տարիների ընթացքում: