Դիարբեքիրում հանվել են Օջալանի նկարով պաստառները

Դիարբեքիրի ոստիկանության աշխատակիցները, դատարանի ընդունած որոշմամբ, քաղաքի գովազդային վահանակների վրայից հեռացրել են քրդերի առաջնորդ Աբդուլլա Օջալանի նկարով պաստառները: Այս մասին տեղեկացնում է թուրքական Demokrathaber.net-ը: Նահանգապետարանի արած հայտարարության մեջ նշվել է, որ երկրում ահաբեկչական համարվող Քրդական աշխատավորական կուսակցության առաջնորդի լուսանկարը փակցնելը քաղաքում ճիշտ չէ: Անվտանգության աշխատակիցները դանակների և անձրևանոցների օգնությամբ սկսել են պատռել պաստառները:

Թուրքիայի քրդական «Խաղաղություն և ժողովրդավարություն» կուսակցությունը Դիարբեքիրի գովազդային վահանակներին փակցրել էր Օջալանի լուսանկարները' վերջինիս ձերբակալման 15-րդ տավա կապակցությամբ: Նկարի տակ եռօրյա քրդական համաժողովին մասնակցելու հրավեր կար:

Թուրքիայի քրդերի առաջնորդ Աբդուլլա Օջալանը ձերբակալվել է 1999 թվականի փետրվարի 15-ին: Դատարանը նրան հայրենիքի դավաճանության մեղադրանք էր առաջադրել: Սկզբում Օջալանը դատապարտվել էր մահապատժի, հետագայում պատիժը փոխվել էր ցմահ ազատազրկման, որը մինչ օրս քրդերի առաջնորդը կրում է Իմրալը կղզու բանտում: