Թուրքիան ողջ աշխարհում մամուլի անազատության ամենախոշոր բանտերից մեկն է

Մամուլի ազատության պաշտպանության «Լրագրողներն առանց սահմանների» միջազգային կազմակերպության` աշխարհում մամուլի ազատության տարեկան ինդեքսի համաձայն, որում ներառված է աշխարհի 180 երկիր, Թուրքիան համարվել է աշխարհում մամուլի ամենախոշոր բանտերից մեկը: Այս մասին  հայտնում է կազմակերպության պաշտոնական կայքը:

«Բանտեր նետված լրագրողների թվաքանակը գերազանցել է բոլոր ռեկորդները և այժմ նրանք 60-ն են, ինչը Թուրքիան դարձնում է աշխարհում մամուլի ամենախոշոր բանտերից մեկը: 2013 թ-ին բողոքի աննախադեպ շարժումը ցուցադրել է թուրքական հասարակության ազատության ծարավը: 2013 թ. ամռանը լրագրողները մեծ գին վճարեցին Թուրքիայում կառավարության դեմ բողոքի շարժման դաժան ճնշման ժամանակ: Լրագրողներին և բլոգերներին մեղադրեցին կառավարությունը տապալելու նպատակով անկարգություններ կազմակերպելու մեջ: Դա բերեց լուրջ ինքնագրաքննության, իսկ իշխանություններին չզիջող լրագրողները հետապնդվում են»,-ասվում է կազմակերպության 2013 թ. համար հրապարակած ինդեքսում:

2013 թ. մայիսի սկզբին Ստամբուլի Գեզի այգու բնապահպանական պահանջներով սկսված բողոքի ակցիաները Թուրքիայով մեկ վերածվեցին հակակառավարական զանգվածային գործողությունների: Իշխանությունները դաժանաբար ճնշեցին ցուցարարներին, որի արդյունքում 5 մարդ զոհվեց, հարյուրավոր մարդիկ վիրավորվեցին, 1000-ից ավելի մարդ էլ ձերբակալվեց, այդ թվում նաև լրագրողներ: