Հայաստանը ՀԱՊԿ-ից կստանա անհրաժեշտ աջակցություն. Նիկոլայ Բորդյուժա

2012-ին նշվում է Հավաքական անվտանգության պայմանագրի ստորագրման 20-ամյակը և ՀԱՊԿ ստեղծման 10-ամյակը: Հայրենիքի պաշտպանի օրվա նախաշեմին, որն ավանդաբար տոնում են փետրվարի 23-ին, ամփոփվեցին 2011-ին հավաքական անվտանգության պայմանագրի կազմակերպության աշխատանքի արդյունքները և ապագա ծրագրերը:

«Հակամարտության կարգավորման գործընթացում մենք չենք խառնվում: Հայաստանը մեր դաշնակիցն է, բայց ԵԱՀԿ Մինսկի խմբի շրջանակներում բանակցությունները շարունակվում են»,- այսօր Երևան, Աստանա, Կիև, Քիշնև, Մինսկ տեսակամուրջի ընթացքում, անդրադառնալով սառեցված հակամարտություններին և մասնավորապես ղարաբաղյան հարցին, նշեց ՀԱՊԿ գլխավոր քարտուղար Նիկոլայ Բորդյուժան:

Բորդյուժան ասաց նաև, որ «ՀՀ-ն ՀԱՊԿ լիիրավ անդամ է՝ իր իրավունքներով և պարտավորություններով: Նա իրավունք ունի օգնություն ստանալ դաշնակիցներից: Իսկ թե ինչպե՞ս, կախված է գործողությունների ձևաչափից, ըստ որոնց էլ որոշում կկայացավի: Բայց կարող եմ ասել, որ Հայաստանը ՀԱՊԿ-ի կողմից կստանա անհրաժեշտ աջակցությունը, որի իրավունքը նա ունի»:

Անդրադառնալով Իրանի նկատմամբ հնարավոր ռազմական գործողությունների դեպքում ՀԱՊԿ-ի քայլերին, Բորդյուժան պատասխանեց. «Լավ կլինի, որ Իրանի նկատմամբ ռազմական հարվածներ չլինեն, բայց մենք դիտարկում ենք իրավիճակը ու քննարկում, թե փախստականներ լինելու դեպքում ինչ քայլեր ենք ձեռնարկելու: Բայց հուսանք, որ Իրանի նկատմամբ գործողություններ չեն լինի»:

Նրա խոսքերով, 2011 թվականը նվիրված էր ճգնաժամային իրավիճակներին արձագանքելու հստակ մեխանիզմների ստեղծմանը, և ՀԱՊԿ-ն աշխատել է շատ ակտիվ ողջ տարվա ընթացքում, իսկ այս տարի փորձելու է պահել նշաձողը: