Նրանք կմնան անպատիժ և կշարունակեն որոճալ երկրի ճակատագիրը

Ոստիկանության համար, մեծ հաշվով, պետք է էական չլինի, թե ով ինչ է վանկարկում կամ ինչ բնույթի թռուցիկներ է բաժանում: Այսօրվա միջադեպը, ՀԱԿ ակտիվիստների հետ կապված, շատ տխուր մտորումների տեղիք է տալիս: Եթե պետական օղակները կարծում են, որ նրանք իրենց ձևակերպումներով օրենք են խախտել՝ համապատասխան մարմինների խնդիրն է դա քննելը, սակայն այն, ինչ այսօր տեսանք Երևանում, շոուի ձախողված ավարտն է: Փաստորեն ՀԱԿ-ի երիտասարդներին են մոտենում նրանց տեսակետները չկիսող այլ երիտասարդներ և փորձում են խլել նրանց թռուցիկները: Այսինքն՝ սամասուդ են անում, բռնանում են մարդկանց իրավունքներին:

Ոստիկանությունը մոտենում է և ընդդիմադիրներին բռնի բերման է ենթարկում, ինչ որ ոստիկանապետ ապտակում է աղջկան՝ դրանով ակնհայտորեն կանխակալ մոտեցում ցուցաբերելով: Սա այն ոստիկանապետն է, որի համար պետք է միևնույն լինի մարդկանց քաղաքական կողմնորոշումը, իսկ օրենքի խախտում նկատելու դեպքում օգտվի օրենքով ընձեռնված գործիքներից: Այս դեպքում նա չի տարբերվում սովորական խուժանից: Այդ դեպքում ամեն մի օրինախախտում պետք է ոչ թե քննի ոստիկանությունը, այլ քուչի լավերը, որոնք պատժի սեփական, պապուասական մեթոդներն ունեն:

Ոստիկանությունը ոստիկանություն է այն դեպքում, երբ քնքշանք չի դրսևորում մարդկանց ակցիան սամասուդ անող երիտասարդների նկատմամբ և հակառակը՝ ընդդիմադիրների: Այդ նույն ոստիկանությունը շատ ավելի քնքուշ է վարվում, երբ ոմանք այլ ակցիաների ժամանակ ամենավերջին լուտանքներն են թափում իրենց հասցեին: Բայց հիմա, երբ կոմսոմոլները խառնվում են գործին, ոստիկանությունը միջամտում է հօգուտ նրանց: Իհարկե, նրանք կմնան անպատիժ և կշարունակեն որոճալ երկրի ճակատագիրը: Ինչպես եղավ սաքուլիկների դեպքում...
Եվ եթե ոմանց ինքնագործունեությունը մնա անպատիժ՝ նշանակում է, որ կամ պետության մեջ բարդակ է և խմբավորումները իրենք են փորձում կատարել ոստիկանության, կամ ավելին՝ պետության ֆունկցիաները, կամ էլ իշխանության համար այնպիսի անհուսալի վիճակ է, որ փոքրիկ կայծերը հրդեհի վտանգ են պարունակում...

Սա պետության վախճանն է, երբ ուսխորհուրդների երիտասարդներն են սկսել որոշել կարելիի ու անկարելիի սահմանը...

Վարուժան Բաբաջանյան

Լուսանկարը` Անի Գևորգյանի