Թուրքիայում սկսել են ազատ արձակել կոռուպցիոն սկանդալի գործով ձերբակալված չինովնիկներին և գործարարներին

Թուրքիայում այսօր ազատ են արձակվել դեկտեմբերի 17-ին Ստամբուլում և Անկարայում անցկացված ապօրինությունների և կաշառակերության գործողությունների շրջանակում կալանավորված կասկածյալներից թուրքական Halkbank-ի տնօրեն Սուլեյման Ասլանը և ևս 8 չինովնիկ: Այս մասին հայտնում է թուրքական «Հաբերլեր» լրատվական կայքը:

Ստամբուլի հանրապետական դատախազությունը մերժել է նույն գործողությունների շրջանակում կալանավորված ներքին գործերի նախկին նախարար Մուամար Գյուլերի որդուն' Բարըշ Գյուլերին, էկոնոմիկայի նախկին նախարար Զաֆեր Չաղլայանի որդուն' Քաան Չաղլայանին և ծագումով ադրբեջանցի գործարար Ռեզա Զարրաբին ազատ արձակելու մասին փաստաբանների պահանջները:

Դատախազությունն ավելի վաղ չեղյալ էր հայտարարել նաև Սուլեյման Ասլանի ունեցվածքի վրա նախկինում դրված արգելանքը: Հակակոռուպցիոն գործողությունների արդյունքում Սուլեյման Ասլանի' Ստամբուլում գտնվող տնից ոստիկանությունը կոշիկի տուփերում պահվող 4,5 մլն դոլար կանխիկ գումար էր հայտնաբերել: