Ինձ համար Արա Երնջակյանը շատ բարձր որակի մտավորական է. Լևոն Իգիթյան (Տեսանյութ)

«Ինձ համար Արայիկ Երնջակյանը շատ բարձր աստիճանի, շատ բարձր որակի մտավորական է», - Երևանի Կամերային թատրոնի ղեկավարի վերաբերյալ կարծիք հայտնեց ճարտարապետ Լևոն Իգիթյանը՝ ի պատասխան Լուրեր.com-ի թղթակցի այն հարցին, թե ինչպես նա կմեկնաբանի Երնջակյանին տրված «ծախու մտավորական» գնահատականը: «Դուք կարող եք մի արտահայտության համար մարդու մինչև այդ իր հայրենիքին մատուցած բոլոր ծառայությունները ջնջել, մարդ գնահատել չգիտեք»,- վրդովված նշեց նա: 

Իսկ թե չի՞ մտահոգում արդյոք Լևոն Իգիթյանին այն փաստը, որ իրեն ևս կարող են դասել նույն այդ «ծախու մտավորականների» շարքը, Իգիթյանը պատասխանեց՝ հայտնի «Ծառայողական սիրավեպ» ֆիլմից մեջբերում անելով. «У меня такая безупречная репутация, что меня уже давно пора скомпрометировать»: Վերջում էլ հավելեց՝ «եթե կարող եք, արեք»:

Հիշեցնենք, որ օրերս Երևանի կամերային թատրոնի գեղարվեստական ղեկավար Արա Երնջակյանը կողմ էր արտահայտվել Մաշտոցի պուրակում, որը հանրային տարածք է, մասնավոր կրպակների տեղադրմանը, ինչի պատճառով էլ սոցիալական ցանցերում վերջինիս տվել էին «ծախու մտավորական» որակումը: